KAPIN sa siyam ka oras na ang ang biyahion gikan ug padulong sa Sugbo ug Cagayan de Oro City sa Northern Mindanao sakay sa bag-ong m/v Lite Ferry 18 sa Lite Ferries Corporation.
Kini ang labing bag-o ug labing paspas nga passenger vessel sa Lite Ferries nga gilusad niadtong Sabado, Nobyembre 17 sa pantalan sa syudad sa Cagayan de Oro. Ang paglusad gitambongan nila ni Cagayan de Oro City Mayor Oscar Moreno ug mga kadagkuan sa Maritime Industry Authority.
Matud sa presidente ug chief executive officer sa Lite Ferries nga si Lucio Lim Jr., kapin duha ka tuig nga gi-renovate ang Lite Ferry 18 nga aduna nay mga bag-ong makina ug mas gipanindot nga amenities.
Gibutyag ni Lim dako’g hagit alang kanila ang pagbutang og biyahe sa Cagayan de Oro sanglit daghang shipping companies sa naasoy nga rota ug ang presensya sa airline companies diin moabot lang sa usa ka oras ang byahe.