GIDAYEG sa mga opisyal sa syudad sa Sugbo ang kapulisan tungod sa malampuson nga kampanya niini batok sa illegal nga drugas.
Kini atol sa ikaupat nga Cebu City Police Advisory Council Summit sa Robinsons Galleria Cebu kagahapon sa hapon, Nobiyembre 19.
Si Bise Mayor Edgardo Labella, niingon nga bisan sa malampuson nga gubat sa kapulisan batok sa illegal nga drugas, nasubo siya sa tinguha nga limitahan na ang paghatag sa kagamhanan sa syudad sa Sugbo sa allowance niadtong mga pulis.
Gusto ni Mayor Tomas Osmeña nga kadto nalang mga pulis nga rehistrado sa syudad ang makadawat sa gigahin nga pundo.
“It saddens me that there was an announcement that those who do not vote in Cebu City, will not be allowed to receive the allowance,” matod ni Labella.
Kooperasyon
Matod ni Sr. Supt. Royina Garma, hepe sa kapulisan sa syudad, nga di nila makab-ot ang kadaogan ang pagbatok sa bisan unsa nga krimen kon way abag sa publiko tungod sa kagamay lang sa pwersa sa PNP.
Ang panaghiusa sa tanan ang yawe aron masumpo ug mabatokan ang krimen.
“It simply means we need to unite and stop pointing the finger, as to who should be working and solving the problem,” matod ni Garma nga bisan wa magngan og tawo, apan iyang gipasabot si Osmeña.
Si Osmeña nipadayag og kasagmuyo sa kahusay ug kalinaw sa siyudad tungod sa sunodsunod nga mga patay.
Alang kaniya di na luwas ang Cebu City tungod niini.
Ang tema karong tuiga nga kalihukan mao ang Panaghiusa ang Yawe sa Kalinaw ug Kalambuan. AYB