GIPANAGNA ug mabasa sa Balaang Kasulatan ang hulagway sa katapusan sa kalibutan.
Sa atong kasaysayan, daghang mga tawo nga nisulay apan pakyas sa pagtagna sa tukmang panahon sa paghukom diin mobalik na si Kristo ug maghari ang matarong kontra sa kadautan.
Adunay timailhan sa iyang pagbalik sama sa grabeng katalagman, giyera, kagutom, pag-usab sa klema ug daghan pang uban. Mangahulog ang bituon sa langit nga mopukan sa tanang linalang sa kalibutan. Sama tingali kini sa nahitabo sa kalit nga pagkawala sa mga dinosaurs sa kanhiay'ng panahon.
Usa ka teyorya nagaingon nga may dako kaayo nga meteor gikan sa kawanangan nga nibangga sa kalibutan ug didto nitugpa sa Arizona. Makita pa karon ang crater sa impact sa maong pagbangga.
Ang maong hitabo nidiskarel sa pagtuyok sa kalibutan sa iyang “axis” o linyang agianan tuyok sa adlaw.
Atol sa pagbangga, niulbo ang dakong abog ngadto sa kapanganuran ug nitabon sa kainit sa adlaw sa pipila ka tuig hangtud nga nipabugnaw sa temperatura sa kalibutan.
Mitabon ang yelo sa tanang dapit ug tungod niini nangamatay ang tanang dinosaurs ug mga kahayupan nga dili makaaguwanta sa hilabihang katugnaw.
Nasaksikan nato kining pagtabon sa abog nga nakapaubos sa temperatura sa pagbuto niadtong 1992 sa Mount Pinatubo.
Matud pa sa mga sayantipiko, nakatabang sa pagpabugnaw sa kalibutan ang maong hitabo nga gikalipay sa climate change advocates. Mapugngan daw niini ang kaalingasa sa klema, pagtunaw sa icebergs nga mopataas sa tubig sa dagat nga mopaunlod sa daghang isla sa kalibutan.
Hasta ang mga gibalitang “apparition” o ang pagpakita ni Birhen Maria sa bisan asang lugar sa kalibutan, gidawat man o wala sa simbahan, nag-asoy sa katapusang panahon.
Ang panghitabo karon nga giyera, kasamok, kriminalidad ug pagkaguba sa kinaiyahan hinimuan sa tawo busa angayang usbon sa tawo ang iyang gawi ug magmahigugmaon sa Diyos.
Apan hinuon, sa tanang mensahe sa paghukom, adunay gisaysay nga paglaum.
Ingon pa sa Balaang Kasulatan nga adunay buhi pa ug makasaksi sa talan-awon sa katapusan sa kalibutan. Gani ang Credo sa Romano Katoliko nag-ingon nga “mobalik Siya aron sa paghukom sa mga buhi ug minatay...”
Buot ipasabot nga sa ikaduhang pagbalik ni Kristo, maghari na ang kalinaw ug gugma sa kalibutan nga gihandom natong tanan. Wala nay giyera, away, pag-abuso sa tawhanong katungod ug kinaiyahan, pagpanglimbong, sakit ug balatian nga way pagkaayo, kagutom ug kauhaw kay Iya nang gitukod ang langit dinhi sa yuta.
Sa pagkakaron, igo na nga gipasidan-an kita nga taliabot na ang katapusan ug mahitabo kini sa mosugot ta o dili.
Naa ra sa atoa kung mosanong kita sa iyang pasidaan pinaagi sa iyang mga mensahero ug mga sinyales sa palibot sa katapusang adlaw. Busa simba-simba sab kung may taym.