PATAY ang duha ka giingong bomb carriers nga gisuspetsahan nga miyembro sa Islamic State (IS)-inspired terror group sa pinusilay batok sa mga awtoridad sa probinsiya sa Sultan Kudarat Lunes sa buntag, Nobyembre 19.

Nasayran gikan kang Police Regional Office-Soccsksargen Director Eliseo Tam Rasco nga napatay ang mga wala pa mailhing mga bomb carriers sa hiniusang puwersa sa Tacurong City Police Station, Isulan Municipal Police Station, Regional Mobile Force Battalion (RMFB), ug Philippine Army.

Gilusad ang law enforcement operation bandang alas 2:30 sa kaadlawon Lunes sa Kapingkong road, Barangay EJC Montilla, Tacurong City sa nahisgutang probinsiya.

Mga suspek giingong milikay sa gimuntar nga checkpoint sa Isulan ug misimang padulong sa Tacurong City, kon diin naharang sila sa laing checkpoint nga gipahimutang sa RMFB.

Apan imbis nga motahan, mga suspek mipaarak hinuon sa ilang armas ngadto sa mga pulis sa checkpoint hinungdan nga nahitabo ang pinusilay nga maoy gikamatay sa mga nahisgutan.

Nasayran nga sa wala pa ang operasyon, nakadawat og impormasyon ang Sultan Kudarat Provincial Police Office nga dunay improvised explosive device ang ibiyahe sa Tacurong City ug Isulan.

Narekober sa gisakyan sa mga terorista nga Suzuki minivan nga dunay temporaryong plaka numero 1201-406246 ang usa ka nine-millimeter berretta pistol nga dunay pangalan sa Philippine National Police, usa ka KG9 ug nagkadaiyang mga bala, usa ka IED, ug usa ka itom nga IS nga bandela.

Milampos ang Sultan Kudarat explosive and ordnance division team sa pagdepyus sa IED alas 4:30 sa buntag, Lunes.

Samtang padayon ang gihimong pagsusi sa mga awtoridad kon ang mga napatay duna bay kalabutan sa sunod-sunod nga pagpamomba sa Isulan sa milabay nga mga bulan nga gikamatay sa lima ka mga tawo ug gikaangol sa laing pang 30. (Uban sa taho sa SunStar Philippines)