SA labing unang higayon sulod sa usa ka dekada, ang Salazar College of Science and Institute of Technology (SCSIT) secondary softball team maoy morepresentar sa Cebu City Niños sa Central Visayas Regional Athletic Association (Cviraa) meet.
Kini human ang SCSIT, nga mingduwa ubos sa kampo sa Unit III, miputol sa usa ka dekada nga paghari sa Abellana National School (ANS) o Unit IX sa bag-uhay lang nahuman nga 28th Cebu City Olympics sa Cebu City Sports Center (CCSC).
Ang SCSIT ningpakaging sa ANS, 8-1, sa championship game sa Cebu City Olympics niadtong Sabado.
Sa interbyu sa Sun.Star Cebu, nagkanayon si SCSIT coach Isiot Bacarisas nga nanghinaot siya nga magpadayon ang maayo nilang duwa sa Cviraa meet nga gikatakda karong Pebrero sa sunod tuig sa Dumaguete City.
Ang hagit karon sa team mao ang paghashas pa og dugang sa ilang kapabilidad alang sa ilang paghamag sa mas malisod nga tahas.
Nagkanayon si Bacarisas nga ang teams sa Cebu Province, Dumaguete City, Bohol ug uban pang dapit sa Rehiyon 7 pulos aduna’y ikabuga. RSC, ESL