NAGPAKATAP og kaugalingon niyang season-high si Lebron James aron agakon ang Los Angeles Lakers sa dakong kadaugan batok sa host Miami Heat, 113-97, kagahapon sa National Basketball Association (NBA).
Kini maoy ika-13 nga higayon nga nakaabot og 50 puntos si James lakip na niini ang Game 1 sa finals sa miaging season diin nagduwa pa sa Cleveland Cavaliers ang four-time MVP.
“It’s just playing with greatness,” asoy ni Lakers guard Lonzo Ball.
“Tonight he took the game over.”
Si James mirehistro og 19-of-31 shooting, 6-of-8 sa 3-point range ug nahimong ikapito pa lang nga magduduwa nga nakaabot og 50 puntos batok sa Heat.
“It’s always great to be here,” matod ni James, kinsa kanhi nakaduwa sab sa Heat.
“We had some not-so-good times, we had more great times, so it’s always a respect factor and a love for the people in Miami and especially the people who work here.”
Ang Lakers mingsaka sa 9-7 nga rekord.
Ang Heat, nga nahagsa sa 6-10 nga baraha, nakaangkon sa ikaupat nilang sunodsunod nga kapildihan sulod mismo sa ilang balwarte.
Sa iyang kapungot, ang usa sa mga pambato sa Heat nga si Josh Richardson na-ejected human niya gilabay ang usa sa ka paris sa iyang sapatos paggawas sa korte.
“I just can’t let that happen,” matod ni Richardson.
Sa laing giatangang duwa kagahapon, ang defending champion Golden State Warriors nasugamak na sab sa laing kapildihan, ning higayuna batok sa host San Antonio Spurs, 104-92.
Kini maoy ikatulong sunodsunod nga kapildihan sa Warriors, nga padayong ningkombati nga wala ang ilang pambatong pointguard nga si Stephen Curry.
Hinuon nagpabilin sa ibabawng bahin sa Western Conference ang Warriors bisan natagak kini sa 12-6 nga rekord.
Ang Spurs,nga mingsaka sa 8-7 nga rekord, gipangulohan ni LaMarcus Aldridge pinaagi sa iyang 24 puntos ug 18 rebounds.
“We’ve had such a charmed existence the last four seasons. So, of course, this is the toughest stretch we’ve been in,” matod ni Warriors coach Steve Kerr.
“This is the real NBA. We haven’t been in the real NBA the last few years. We’ve been in this dream. So, now we’re faced with real adversity. We’ve got to get out of it ourselves.”
Gawas kang Curry, wala sab si Draymond Green miduwa sa Warriors tungod kay aduna kini angol sa tiil.
Gipangulohan na sab ni Kevin Durant ang Warriors pinaagi sa iyang 26 puntos samtang nidugang og 25 puntos si Klay Thompson. AP, ESL