HAYAN mag-atubang og mas bug-at nga silot ang tulo ka mga pulis sa Talisay city nga naa sa traffic division nga maoy ningtubag sa alarma sa trapiko nga naglambigit sa anak ni Mayor Soc Fernandez sa miaging semana.

Una niini, si Joavan gipasanginlan sa miaging semana nga nikalit pagbabag sa motorsiklo sa magtiayon ginamit ang iyang sakyanan.

Click here for stories and updates on the Sinulog 2010 Festival.

Tungod sa hitabo, nangaangol ang magtiayon ug nipasangil sa batan-ong Fernandez nga nanion pa kanila og pusil.

Sila si SPO1 Elmer Saladas, PO2 Roelito Tano ug PO1 Manolito Daal gipangrelibuhan ni Supt. Henry Biñas tungod sa ilang kapakyas sa pag-impound sa sakyanan ni Fernandez.

Si Tano gibalhin isip jailer samtang sila si Daal ug Saladas sa station sa Poblacion.

Gawas pa nini, gireklamo sa magtiayong Jonathan ug Irene Ignacio nga napakyas ang mga pulis sa pagrekisa kang Fernandez.

Si Cebu Provincial Police Director Senior Supt. Erson Digal niingon nga ang pagrelibo sa tulo ka mga pulis di pa igo kon masuta kon aduna gyoy nahimong kalapasan.

Matod ni Digal nga iya nang gimandoan si Binas ug iyang inbestigador sa probinsya sa paghimog imbestigasyon labot sa hitabo.

Nagkanayon si Digal nga pagkasuspenso ug pasakaag kaso maoy angay atubangon sa mga pulis kon mamatud-ang nakahimo gyod kinig kalapsan.

Ang pagrelibo sa tulo ka mga pulis giuyonan ni PRO-7 Director Chief Supt. Lani-o Nerez sanglit katungod man kini ni Binas isip hepe. Iyang gipahinumdoman ang kapulisan nga ipatuman ang balaod nga way kahadlok ug pagpinig ni bisan kinsa bisan og anak pa kini sa mayor.(DRT)