DUHA ang nangamatay samtang laing duha ang nangaangol human maaksidente ang motorsiklo nga ilang gisakyan sa Cebu South Coastal Road (CSCR) sa barangay San Isidro, Talisay City kagahapon sa kaadlawon.

Ang motorsiklo nga gituohang kusog kaayo ang dagan nga gisakyan sa upat ka mga biktima nalamba.

Click here for stories and updates on the Sinulog 2010 Festival.

Ang kakusog sa impact maoy gituohang usa sa nakaingon sa kamatayon sa duha sa upat ka mga biktima.

Giila sa kapulisan ang mga nangamatay nga sila si Kin-Kin Reponte ug Roldan Repolido, pulos 21,, mga ulitawo, taga sitio Kayam, Colon, City of Naga, Cebu.

Samtang ang mga nangaangol mao sila si Edmund Bucao, 23,nga maoy nagmaneho sa motorsiklo ug ang ikatulong backrider nga si Calvin Gabiana, 25, ug pulos taga Kayam, barangay Colon.

Si PO1 Alrasid Jemlani, traffic police on duty nibutyag nga ang upat paingon sa barangay Tanke dihang nawad-an og pakontrolar sa manubela ang driver nga si Bucao paghiabot sa intersection sa CSCR sa San Isidro pasado alas 4:00 sa kaadlawon.

Kusog ang pagkatumba sa motorsiklo hinungdan sa pagkamatay sa duha ug pagkaangol sa laing duha.

Si Reponte patay dihadiha samtang gideklarar si Repolido nga dead on arrival sa Talisay District Hospital.

Ang imbestigasyon sa kapulisan sa traffic division nagbutyag nga kusog ang dagan sa motorsiklo ug grabe sab ang impact sa pagkabunal nila ni Reponte ug Repolido hinundan sa ilang kamatayon..

Si Bucao kasamtangan nga gitanggong sa detention cell ug gi-impound ang iyang Honda nga motorcycle nga dunay plate number L-6151 samtang gipaabot pa ang resulta sa imbestigasyon.

Ang mao nga karsada usa sa mga dapit nga taas ang mga aksidente.

Kini tungo sa grabe sab nga pagpadagan sa mga sakyanan kay lapad ang mga dan.