SECTIONS
Saturday, May 25, 2019
SUPERBALITA CEBU

Diputado: Ang tagna-tagna sa Bohol

DUNAY dakong tagna-tagna karon sa Bohol.

Migawas kini human gikabalita nga mobisita na sab si PRRD sa Bohol karong Nobiembre 27 alang sa “soft opening” sa bag-o nga Panglao Airport.

Ang tagna-tagna mao kini – basahon ba ni PRRD ang gitawag og “drug matrix” atol sa iyang pagbisita?

• • •

Nganong migawas man kining maong pangutana?

Migawas kini human mabalita ang hapit kada-adlaw nga pagpangdakop sa mga namaligya sa druga sa dinagko na nga kantidad sa lain-laing lugar sa lalawigan sa Bohol.

Dili na linibo kondili minilyon na nga kantidad sa mga druga ang nadakpan sa kapolisan nga halos kada adlaw na lang.

Buot ipasabot, mi-grabe na hinuon ang sitwasyon sa druga sa Bohol.

Buot ipasabot, dili tinuod ang pasiatab nga “drug-free” ang Bohol.

Og buot ipasabot nga tinuod diay ang balita nga number 1 ang Bohol sa Visayas og number 5 ang Bohol sa tibuok nasod kon hisgotan ang problema sa ilegal nga druga.

• • •

Matod pa sa balita, duna kunoy “drug matrix” nga anaa karon sa mga kamot ni PRRD.

Unsa man kining “drug matrix?”

Matod pa, ang “drug matrix” usa ka listahan sa mga tawo nga nalulong sa ginadili nga druga og matod pa, duna kunoy mga dagkong opisyal ang nalakip sa maong lista.

Apil na niini kadtong mga tawo nga nagbaligya, nag-supply, nagpanalipod sa mga nadakpan, hasta kadtong gitawag og nag-negosyo sa ginadiling druga.

Pasabot niining naulahi, kadtong mga negosyante nga igo lang mibubo sa ilang puhunan aron gamiton sa pagpalit sa druga og mipupo sa dakong ganansiya sa maong negosyo. Pasabot, mga kapitalista lang sa ginadiling druga.

• • •

Kon tinuod nga anaa kining maong “drug matrix” sa mga kamot ni PRRD, unsa may bili niini kon dili niya kini basahon?

Unsa may bili niini kon dili niya kini gamiton?

Magamit lamang kini kon iyang basahon ang maong listahan atol sa iyang pagbisita karong sunod semana sa Bohol.

Nganong nahimo man kining tagna-tagna?

• • •

Kadtong naghimo sa maong negosyo sa druga, apil na ang mga dagkong opisyales sa Bohol nga gitawag ni kanhi CabSec Jun Evasco og “dakog tiyan, mubo og lingin og nawong” nahibalo og nasayod nga delikado ang ilang kinabuhi o kahimtang kon basahon gyod ni PRRD ang maong listahan.

Tungod niini, natural na lang nga gamiton gyod nila ang tanan nilang mahimo nga dili gyod kini mahitabo.

Unsaon man?

Usa na niini mao ang pag-limit sa panahon ni PRRD sa Bohol, pinaagi sa paghimo lang sa pipila ka mga kalihokan aron pagseguro nga way panahon alang sa gitawag og “drug matrix.”

Kon makontrol nila ang mga kalihokan atol sa pagbisita ni PRRD sa Bohol, hayan walay mahitabong pagbasa sa maong “drug matrix.”

• • •

Unsay mahitabo kon basahon ni PRRD ang maong listahan?

Daghan ang posibilidad.

Usa na niini ang pagkatumba sa kandidatura sa mga naapil kon kandidato sila sa piniliay sa sunod tuig.

Segurado gayod nga maapektohan ang ilang tsansa sa pagdaog kon naapil sila sa lista.

Ikaduha niini mao ang pagkahitabo sa dili angay nga mahitabo.

Unsa man kini?

Kanang parehas bitaw sa ubang lugar nga kalit lang nga dunay gipusil-patay unya mabalita na lang nga gi-ambusan ang maong nalista sa wala pa mailhing mga tawo.

Ikatulo niini mao ang pagpasaka sa kaso batok sa mga nalista sa maong “drug matrix.”

Tungod niini, dunay bug-at nga hinungdan ngano nga ila gyod nga babagan ang pagbasa sa maong “drug matrix.”

Ang ikaduhang pangutana mao kini – unsa may inyong tagna sa maong tagna-tagna?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!