KAMPEYON ang Cabulohan Paradise National High School (CPNHS) sa Cabanglasan, Bukidnon sa ika-34 na tuig sa Drum and Lyre Competition 2018 sa Rotary Club of South Cagayan de Oro nga gipahigayon Nobyembre 18, sa Pelaez Sports Center, dakbayan sa Cagayan de Oro.
First runner-up ang Misamis Oriental General Comprehensive High School (MOGCHS) sa dakbayan sa Cagayan de Oro, ug 2nd runner-up ang Geronima Cabrera National High School sa Lanao sa High School category.
Sa elementarya nga kategorya, nasakmit sa Lapasan East City Central School ang kampeyonato, 1st runner up ang San Martin Elementary School sa Villanueva, ug Kalingagan Elementary School ang 2nd runner up.
Samtang ang mga minor awards sama sa best band major, best band majorette, ug most disciplined group nakuha sa Lapasan City Central School; best in costume sa PN Roa Elementary School; ug social media award sa Iligan City Central School nga nakakuha og 32.3K reached engagements sa elementarya nga kategorya.
Sa high school nga kategorya, nakuha sa CPNHS ang best band major, best band majorette, ug most disciplined group nasakmit sa Geronima Cabrera National High school, ug best in costume ug social media award mao ang MOGCHS diin niabot og 46.2k ang reached engagements.
Kapin 7,000 ka mga bisita ang misaksi sa kompetisyon diin anaa sa 15 ka mga tunghaan ang misalmot nga gilangkoban sa walo ka mga elementarya nga tunghaan nga mao ang Tambo Central School, PN Roa Sr Elementary School, Iligan City Central School, San Martin Elementary School, Kalilangan Elementary School, Casinglot Tagoloan Elementary School, East City Central School, ug Alae Central School.
Samtang dunay pito usab sa high school diin gilangkoban sa Misamis Oriental General Comprehensive High School (MOGCHS), Gusa Regional Science High School, Cabulohan-Paradise National High School, Pilgrim Christian College, Patag National High School, Cagayan de Oro National High School ug Geronima Cabrera National High School.
Gibutyag ni Antonio Resma Jr, presidente sa Rotary Club of South Cagayan de Oro nga mapasalamaton sila sa mga partisipante lakip na sa mga ginikanan nga nagsuporta sa ilang mga anak, ug sa tanan nga miabag niining maong tinuig nga kalihokan, ilabi na sa mga sponsor aron nga mamahimo kining malampuson.
Nagpasalamat usab kini gumikan kay ubay-ubay ang mga nipartisipar ug misaksi mismo sa maong flagship program sa maong grupo.
Mismong si DG Francisco Manga District Governor Rotary International District 3870 ang usa sa mga nisaksi ug judge atol sa maong kalihokan.
“Malampuson kaayo kay daghan gyud naka tan-aw,daghan nalingaw ug daghan sad kaayo tag partisipante dili lang gyud giakns a Cagayan de oro from all over the region,” pahayag ni Resma.
Nasayran nga tinuig kini nga kalihokan sa Rotary Club diin nagsugid niadto pang tuig 1984.
Nanghinaot usab ang Rotary club nga magpadayon ang suporta sa maong kalihokan diin dako usab kini nga tabang alang sa mga kabatan-onan. Gitapos usab sa maong grupo ang malampuson nga kalihokan pinaagi sa fellowship and evaluation diha sa Cucina Higala.
Ang mananaog makadawat og kantidad nga P50 mil, P30 mil, ug P20 mil alang sa Champion, 1st runner-up ug 2nd runner-up alang sa high school category samtang P40 mil, P20 mil ug P10 mil alang sa elementary category.