ORMOC CITY - Hugot nga pagpangandam ang gihimo sa mga lokal nga kagamhanan sa Eastern Visayas tungod sa bagyong Samuel.
Ang lalawigan sa Leyte, Samar, Biliran ug Southern Leyte nagdeklarar og class suspension.
Ang Ormoc City nagdeklara usab og class suspension samtang sa Tacloban City klase ug trabaho sa lokal nga kagamhanan ang gisuspenso.
Sa dihang gipaubos na sa storm signal ang Leyte ug Cebu, wala na motugot ang Coast Guard Ormoc nga makabiyahe ang nga fastcraft ug dagkong barko.
Nagtagbo usab ang mga sakop Ormoc City Disaster Risk Reduction and Management Office (CDRRMO) aron ilatag ang mga plano.
Si Vice Mayor Toto Locsin Jr, nimando nga i.-monitor ang lebel sa tubig sa Pagsangaan River sa Barangay Liloan ning dakbayan.
Delikado ang maong lugar gumikan kay dunay uban nga nagtukod og balay daplin sa sapa.
Nakaandam na usab og liboan ka food packs ang Ormoc City Social Welfare and Development nga ipanghatag ugaling og duna nay evacuees.
Si City Councilor Vince Rama, mipasiguro nga naka andam na usab ang generators alang niadtong mga lugar nga mapagngan og suplay sa tubig.
Naka-standby na usab ang R1, R2, R3, R4 ug R5 nga mga Hi-ace van sa Ormoc Rescue team ingon man ang ilang Optimus ug Hercules rescue vehicle.
Gisiguro usab sa DPWH 4th LED ug City Engineering Office nga dili barado ang mga drainage sa dakbayan.
Sa Kananga Leyte, gitagbo usab ni Mayor Rowena Codilla ang MDRRMO.
Gisiguro sa mga sakop niini nga mamonitor ang mga flood and landslide prone areas sa lugar.
Naka andam na usab ang mga foodpacks ug kahimanan sa lungsod ugaling dunay mangayo og tabang. JKDP