Klase, byahe sa barko sa MisOr balik na sa normal

BALIK sa normal ang klase, lakip ang mga biyahe sa mga lantsa ug barko, human giwala na sa Philippine Atmospheric, Geophysical, and Astronomical Services Administration (Pagasa) ang Signal Number 1 sa Tropical Depression Samuel sa lalawigan sa Misamis Oriental.

Gikumpirma ni Jun Dy, Provincial Risk Reduction Management Department (PDRRMD) head, nga balik sa white status ang probinsya alas 2 pa sa kadlawon Martes, Nobyimbre 20, diin nagpasabot balik sa normal tanan ang klase ug mga transaksyon.

Gipasalamatan ni Dy nga walay natala nga mga insidente, ug wala sab kaayo nabati sa lalawigan ang epekto sa bagyo.

Wala kaayo nasinatian nga mga pagkusog sa ulan gawas lamang sa bagang panganod nga mitabon sa kalangitan.

Dugang ni Dy nga naatiman sab sa insakto ang 25 ka mga na-stranded na pasahero sa Balingoan Port nga padulong unta sa probinsya sa Camiguin.

Nakasakay na ang mga pasahero sa unang biyahe sa lantsa sa Nobyimbre 20.

Mapasalamaton sab kini sa iyang mga sakop nga nagtukaw ug nagmatikod sa palibot aron mahatagan lamang og proteksyon ang katawhan sa lalawigan.

Gibutyag ni Dy, nga wala pa sila’y na monitor nga laing kadaot sa panahon sa pulo sa Mindanao.

Samtang basi sa monitoring sa Pagasa miigo ang mata sa bagyong Samuel sa Borongan City, Eastern Samar, ug sa Daram, Samar.

Ubos na karon sa Signal Number 1 ang mga lugar sa Masbate, Ticao Island, Romblon, Southern Oriental Mindoro, Southern Occidental Mindoro, Palawan, Cuyo Island ug Calamian Group of Islands.

Lakip sab niini ang Northern Samar, Eastern Samar, Samar, Biliran, Leyte, northern Cebu, northern Negros Occidental, Guimaras, Iloilo, Capiz, Aklan ug Antique. (SVB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph