LAING tulo ka mga undersecretary sa buhatan sa Department of Social Welfare and Development nga nailhang gikan sa pundok sa mga walhon ang gitangtang ni Presidente Rodrigo Duterte bag-ohay lang gikan sa ilang mga trabaho.
Si Maria Lourdes Turalde-Jarabe, Usec sa Promotive Operation and Program Group kinsa kanhi secretary general sa Gabriela, si Usec Hope Hervilla for Disaster Response Management Group kinsa kanhi Regiomal Chairman sa Bayan Muna ug si Usec Mae Ancheta Templa sa Protective Operations and Prpgrams Group, miyembro sa Forum of Women for Action.
Kurapsiyon, matud ni Presidente Digong ang hinungdan nganong iyang tanggalon ang iyang mga tinudlo sa maong buhatan sa iyang pagpamulong atubangan sa komunidad sa mga Pinoy didto sa Papua New Guinea niadtong milabay nga Biyenes, busa dili sila angayan magpabilin sa ilang puwesto.
Apan ang tigpamaba sa Presidente, nagsulti nga pamaagi kini aron mahatagan og higayon si DSWD Secretary Rolando Bautista nga ilisan sa mga tawo nga iyang masaligan sa buhatan sa paghatud og serbisyo sa katawhan.
Kon atong sabton, dili gyud puwede mag-uban ang kanhi Chief of Staff sa kasundalohan ug ang mga walhon sa usa ka opisina tungod “langis at tubig” ang ilang kahimtang nga dili gyud magkasagol o magtukma ang ilang baruganan.
Sa laing bahin, 29 ka kasabutan ang gipirmahan ni Presidente Duterte ug Xin Jinping nga kon atong ayuhon sa pagsabot nagkahulogan sa kalamboan sa atong nasud.
Masabot nga mas gipalig-on ni President Duterte ang relasyon sa Pinoy ug Intsik.
Nangutana ko sa usa ka lalaki sa Osmeña Park kon uyon ba siya nga mahimong kaalyado nato ang intsik? Naglingo-lingo siya ug dayon komedya nga nagkanayon, “lisud sila ikauban kay dili masabtan ang ilang sinultihan.”
Kon kalamboan ang atong tan-awon, hilabihan ang pagsutoy sa kalamboan sa China kay utangan naman gani ang Estados Unidos sa maong nasud.
Ato kining padayunon sunod nga paghisgot.