NAKAKOLEKTA og 12 ka mga medalya ang Cebu City Muay Thai figthers sa 3rd Muay Thai National Championships nga gipahigayon niadtong Nobiyembre 15-20 sa Multi-Purpose Arena sa Philsports Complex sa Pasig City, Metro Manila.
Sa 14 ka fighters nga gipadala sa Cebu City sa kompetisyon, duha lang ang wala nakasakmit og medalya.
Ang Cebu City nakahakot og lima ka gold medals, upat ka silver medals ug tulo ka bronze medals.
“Proud kaayo ko sa mga bata sa ilang pag-represent sa Team Cebu City Muay Thai,” matod ni Muay Thai Philippines-Cebu president Master Benigno “Ekin” Caniga sa interbyu sa Sun.Star Cebu.
Ang mga nalabni og gold medals alang sa Cebu City mao sila si Adrie Lanz Caniga, Allan Albindo, Mark Alforque, Simon Uchina ug Buen Algono.
Ninghatag og silver medals mao sila si pro MMA fighter Ruel Rosauro, Rey Leander Velasco, Radel dela Cerna ug Yul Martinez samtang ang ningtunol og bronze medals mao sila si Raymond Berandoy, Jhon Agustine Simbajon ug Marvin Petiluna.
“Kini maoy pinakadako nga national Muay Thai event diiin adunay 400 athletes ang apil. Nindot ang ilang performance karong tuiga kay last year, wala man ta nakaapil,” dugang ni Master Ekin.
Si Master Ekin nagpasalamat og dako sa Cebu City Sports Commission (CCSC) pinangulohan sa tsirman niini nga si Edward Hayco gumikan sa pagsuporta sa ilang kampanya.
Gitataw ni Master Ekin nga dili sila makaapil sa kompetisyon kon ang suporta sa CCSC.
Ang kompetisyon maoy usa sa mga basihan sa pagpili og mga sakop alang sa Philippine National Muay Thai team.
Sa ilang dakong kalampusan, nagkanayon si Master Ekin nga nagplano siyang palapdan pa ang iyang pag-promote sa Muay Thai sa dakbayan sa Sugbo. ESL