NANGHINAOT si Filipino boxing icon Manny Pacquiao nga magkauban sila og balik ni Hall of Fame trainer Freddie Roach alang sa iyang umaabot nga away batok kang African-American Adrien Broner karong Enero 19 sa MGM Grand Garden Arena sa Las Vegas, USA.
Ang Pambansang Kamao sa Pilipinas nakadesisyon nga putlon ang ilang 16 ka mga tuig nga panag-uban ni Roach sa wala pa ang iyang away batok kang Lucas Matthysse niadtong Hulyo sa Kuala Lumpur, Malaysia.
Daghan ang miisa nga mga kilay dihang gibutyag ni Pacquiao sa usa ka press conference nga tinguha niyang kuhaon og balik si Roach.
Sa interbyu sa Sports Illustrated, nagkanayon si Roach nga tanghaga pa ang tanan alang kaniya gumikan kay wala pa niya ikasulti ang 8-division world champion.
“I still have never directly spoken to Manny (since 2017),” matod ni Roach.
“I’m not going to make a move until Manny calls me. I’ve been like a father to Manny for 15 years. If he can’t call me, there will be no deal.”
Gitataw ni Pacquiao nga ning higayuna, gusto niyang kuhaon si Roach isip supervisor sa iyang dugay nang suod nga higala nga si Buboy Fernandez, kinsa maoy iyang gitahasan isip head trainer.
“I don’t have any problem with Freddie Roach. All I say is that I think the other work in training should be assigned or designated to Buboy,” pasabot ni Pacquiao.
“Freddie can supervise or instruct Buboy, this is what we’re going to do.”
Giangkon ni Pacquiao nga wala pa sila nag-estorya ni Roach kabahin sa iyang plano.
“My idea is to let Buboy handle the mitts, and (Freddie) should just supervise and correct the training situation, or techniques, or anything like that,” dugang ni Pacquiao.
Gibutyag ni Pacquiao nga plano niyang tungaon sa duha ang iyang training camp, ang usa ipahigayon sa Pilipinas samtang ang laing usa sa Amerika.
Matod ni Pacquiao nga sa iyang training sa Pilipinas, puwede ra nga wala si Roach ug maghuwat na lang kini inig balhin sa iyang training camp sa Amerika.
Taliwala sa ilang ka suod, giangkon ni Pacquiao nga dili na siya makahinumdom kon kanus-a sila katapusang nagkasulti ni Roach.
Gipasabot ni Pacquiao nga wala siya nakahigayon pagtawag kang Roach tungod sa kadaghan niyang gimbuhaton isip usa ka senador sa Pilipinas. ESL