SUPERBALITA CEBU

Patria de Cebu gub-on, himuong moderno

BISAN kon i-demolish ang Patria de Cebu alang sa himuon nga redevelopment sa dapit, magpabilin ang heritage value niini nga magpahinumdum sa katawhan sa mga sugilanon sa pagsuway ug kalisod nga naagian sa mga tawo nga nagtukod sa edipisyo.

Si Padre Brian Brigoli, chairman sa Commission on Culture and Heritage sa Artsidyoesis sa Sugbo, nitug-an nga magbilin sila og pipila ka hollow blocks nga gitawag og Ave Maria hollow blocks sa edipisyo.

Gamiton kini alang sa ibutang nga marker sa dapit nga magsilbi nga handumanan sa edipisyo sa Patria.

Maghimo usab sila og diorama sa lugar nga magpakita sa makasaysayanon nga tibuok building sa Patria.

“So that we will be creating something that’s still sensitive to its past, sensitive to its heritage value,” matod ni Brigoli dihang nahinabi sa Superbalita Cebu.

Ang Artsidyosesis sa Sugbo ug Cebu Landmasters Inc., (CLI) nisud og kasabotan alang sa pag-transform sa 6,670 metro kwadrado nga propiyedad ngadto sa mixed-use nga proyekto.

Ang CLI naggahin og P900 milyones alang sa maong proyekto.

Base sa giaprobahan nga master plan, apil sa tukoron sa CLI sa dapit ang office building, department store, supermarket, Rome-inspired public plaza ug duha ka towers-- usa ka 14 ka andana ug usa ka 16 ka andana.

Si Cebu Archbishop Jose Palma ug CLI chief executive officer Jose Soberano III ang nangu sa pagpirma sa kontrata alang sa build, operate ug transfer (BOT) sud sa 40 ka tuig, niadtong Lunes, Oktubre 29.

Tinguha sa CLI nga mahuman ang proyekto sa 2021, nga maoy kasaulogan sa kasumaran sa ika-500 ka tuig nga pag-abot sa Kristiyanismo dinhi sa Sugbo.

Ang dapit magsilbi nga centerpiece sa dakong kasaulogan sa simbahang Katoliko sa Sugbo.

Si Brigoli nibutyag nga adunay lima ka presenters nga interesado nga mopalambo sa lugar ug nipakita sa ilang business ug development proposals dihang ilang gibuksan ang imbitasyon alang sa plano nga palambuon ang Patria de Cebu.

Matod niya, sa miaging tuig pa nitumaw ang maong plano apan, upat ka buwan pa lang ang nakalabay dihang ilang gisugdan og tan-aw ang mga proposal.

Sigon niini tulo ka kategorya ang gitan-aw sa selection committee sa pag-classify ug pag-rate sa mga proposal nga gisumitir ug ang labing maayo nga tanyag sa natad sa kaugmaran, patigayon ug social impact aspect o corporate social responsibility, maoy gipili.

“There was a process that has been undergone in order to really select the best offer. The best proposal, which goes to Cebu Landmasters,” niingon si Brigoli nga wa nganli ang laing upat ka presenters.

Ang selection committee gilangkoban sa mga miyembro sa administrative council, board of consultors, ug presbyteral council.

Ikaduha na ang Patria

Ang Patria de Cebu natukod niadtong 1954. Una kining nagsilbi isip youth recreation center, kumbento sa mga madre ug karon budget-friendly hostel alang sa mga pilgrim ug mga bisita sa dakbayan sa Sugbo.

Sa maong edipisyo usab nag-opisina ang National Citizens’ Movement for Free Elections (Namfrel) niadtong 1986 snap elections sa nasod.

Sa maong building usab gipahimutang ang lainlaing mga commission sa artsidyosesis sama sa Office of Economic Affairs-Oeconomus, Chancery, Tribunal Court, Pastoral Planning Board, Diocesan Curia ug uban pang mga buhatan.

Siya nitug-an nga ibalhin sa laing propiyedad sa simbahang Katoliko sa Sugbo ang maong mga buhatan.

Si Brigoli nibutyag nga ang Patria de Cebu ang usa sa mga propiyedad sa artsidyosesis nga ilang gipaugmad ug gipalambo.

Nauna na ang duha ka ektarya nga lote nga gipanag-iya sa artsidyosesis sa Barangay Mabolo, ning siyudad nga gipalambo sa Duros Land nga maoy gitukoran sa International Eucharistic Congress (IEC) Pavilion nga gipahigayonan sa ika-51 nga IEC dinhi sa Sugbo, nga karon naila na nga IC3.

Ave Maria hollow blocks

Sumala ni Brigoli natukod ang Patria gumikan sa pagtinabangay sa mga estudyante ug mga miyembro sa Archdiocesan Student Catholic Action (SCA) kay niadtong dekada 50 wa sila’y magamit nga pacilidad isip kalingawan sama sa pagduwat og bowling ug billiards ug mag-swimming.

Dugang niya usa sa mahinungdanong bahin sa katukoran sa Patria de Cebu kay giingong maoy unang edipisyo sa dakbayan sa Sugbo diin gi-incorporate ang tie beam system diin i-tie up ang columns ug usahon aron maseguro nga makasagubang ang building sa bisan unsang pagtay-og sa yuta o linog.

Laing mahinungdanong kasaysayan sa pagtukod sa Patria mao ang Ave Maria Hollow Blocks.

Asoy ni Brigoli nga nadunggan niya nga ang mga estudyante nga mga miyembro sa SCA nag-ampo og Ave Maria o Hail Mary inig kuha nila sa matag hollow block gikan sa hulmahan.

Ang tibuok edipisyo sa Patria kay giingong ginama sa Ave Maria hollow blocks.

Gidugang niii nga wa makasinati og dakong danyos ang Patria de Cebu dihang gitay-og og kusog nga linog ang Sugbo niadtong 2012 ug 2013 ingon man ang supertyphoon Yolanda niadtong 2013.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph