NAHIBALIK na ang tanang biyahe sa barko paingon ug pagawas sa Sugbo human gilibkas sa Philippine Coast Guard (PCG) 7 ang suspensyon niini sugod kagahapon sa buntag, Nobiyembre 21.
Sa pagkutlo ning balita, ang biyahe nalang paingon sa Northern Negros Oriental ug Western part sa Visayas ang wala pa tuguti sa PCG 7 kay ubos pa sa Signal No. 1 sa uwahing update sa Philippine Atmospheric Geophysical Astronomical Services Administraton (Pagasa), alas 2 sa hapon kagahapon.
Sa advisory sa PCG 7 kagahapon sa alas 6:30 sa buntag, unang gilibkas ang suspensyon sa biyahe paingon sa Bohol, Dumaguete City, Siquijor, ug pantalan sa Mindanao.
Apan nagpabilin nga wa pa tuguti ang biyahe sa barko sa Northern Cebu.
Alas 3 sa hapon na kagahapon dihang hingpit na nga gipabiyahe human wa na gipaubos sa Signal no. 1 ang Northern Cebu alas 2 sa hapon kagahapon.
Liboan liboan ka mga pasahero ang nangatanggong human gisuspenso sa PCG 7 ang biyahe sa mga pantalan sa Sugbo niadto pang Lunes.
Dagsa usab kagahapon ang mga pasahero sa nagkadaiyang mga pantalan paingon sa destinasyon niini.
Matod ni LTJG Michael John Encina, tigpamaba sa PCG 7, nga karong adlawa tugotan na nila ang mga motorbanca sa mga mananagat nga makapanagat na.