‘Gi rape og ka 21’; biktima patay na

NASIKOP ang usa ka 65 anyos nga lolo human malutsan og warrant of arrest sa 21 ka ihap sa kasong pagpanglugos sa iyang apo nga nagpangidaron pag 11 anyos niadtong 2008.

Apan hayan makalingkawas ang lolo kay ang apo namatay na.

Ang 703rd Mobile Company sa Regional Mobile Force Battalion-7 nga nagbase sa Sibonga armado og warrant of arrest nga giluwatan ni Judge

Leopoldo Cañete sa Regional Trial Court (RTC) Branch 60 sa lungsod sa Barili.

Ang mga ngan sa suspek ug biktima gipugngan ning mantalaan tungod sa hangyo sa kapulisan.

Matod ni SPO1 Josefina Beriarmente hepe sa Women and Children Protection Desk sa Badian police station nga gihimong sex slave sa suspek ang bata sanglit anaa nagpuyo sa ilang balay.

Niadtong higayuna ang bata didto nagpuyo samtang nagtungha kini sa lungsod sa Badian.

Igaid

Giingong nagsugod ang pagpangabuso niadtong Oktobre 2008.

Matag panahon nga hilabtan siya sa iyang apohan, hulgaon siya kon motug-an.

Buhaton kini kon molakaw ang lola sa bata aron mamaligyag utanon sa merkado sa Badian, lugoson sa lolo ang iyang apo.

Sa paglugos, ihigot sa katre ang duha ka mga kamot niini ug baatan ang baba sa bata.

Nasublian kini sa makadaghang higayon hangtod nga nakahukom ang biktima nga motug-an sa iyang apohang babaye ug gi report dayon sa kapulisan.

“Matag lakaw sa lola kay maninda sa merkado sa ilang barangay, koanon sad siya sa iyang lolo hilabtan nya ihikot siya sa koan ihikot siya sa katre nya baatan siyag nuog,” asoy ni Beriarmente.

Apan pipila ka tuig na ang nakalabay namatay ang bata sa sakit nga wala pa mataral ang iyang kaso.

Matod ni Beriarmente nga posibling maabswelto ang kaso sa lolo sanglit ang biktima nga nag silbi usab nga saksi namatay.

“Modagan ang kaso sir pero ang ilang depensa nga wala na ang bata ikoan nila ang death certificate didto sa korte posibling i-dismiss, Sir, kay ang pangunahing witness ani kini mang biktima kung wala na siya dili na mo dagan ang kaso,” dugang ni Beriarmente.

Kasamtangan pa nga gitanggong sa Badian police station ang suspek ug gipaabot ang mando sa korte sa pagpagawas niini. AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph