WAY nakitang foul play ang Mabolo police station sa pag-ambak sa usa ka accounting assistant sa Pag-ibig office kagahapon sa buntag sa Miyerkules, Nobiyembre 21.
Si Anthony Ang, 24, nakaangkon og grabeng kadaot sa ulo ug lawas tungod sa kataas sa iyang giambakan.
Niambak siya gikan sa roofdeck sa edipisyo.
Matod ni SPO1 Antonio Din, homicide investigator sa Mabolo police station, nga problema sa pamilya ang ilang gitan-aw nga hinungdan nganong nakahukom si Ang nga magpakamatay.
Sa unang pagduda sa mga imbestigador, adunay problema sa hinigugma si Ang.
Apan sa dihang nahinabi niini ang igsuong babaye ni Ang, ilang nasayran nga aduna kini gihambin nga problema sa pamilya.
Wala na mohatag pag detalye ang igsuon niini ug wala nalang usab mamugos ang kapulisan pagsusi.
“Gipangutana nako ang igsuon ug ang mama, wala daw ni uyab. Unya didto misaka sad mi sa taas sa opisina. Wala sad daw gyud ni uyab. So, family problem daw ni kay nagkita pa ni sila sa balay nya murag nag-away silang managsuon,” matod ni Din.
Ipaubos nila sa autopsy ang lawas ni Ang aron masiguro nga wa kini foul play.
Nitug-an sa gwardya sa building nga si Ang ra ang nag-inusara sa roof top sa building.
Gidali unta kini og apas sa mga gwardya nga nakakita sa CCTV camera, apan wa na nila maabti kay dali nga nakaambak.
Hilumon
Gihulagway nga hilumon ug buotan si Ang sa iyang mga kauban sa opisina.
Si Ang accounting staff sa short term loan division sa Pagibig Cebu.
Matod sa short term loan division chief sa Pagibig Cebu nga si Rowena Lao nga wa sila’y nabantayan nga lahi kang Ang.
Niadtong Lunes ug Martes dihang ni-absent kini nga wala mananghid.
Abril ning tuiga dihang nisulod sa ilahang ahensiya si Ang isip accounting staff.
Nagtuo silang anaa kini magpuyo sa Barangay Mabolo, dakbayan sa Sugbo.
Niadtong Martes sa gabii dihang nakadawat og text message si Marelie Capocong, accounting assistant, gikan kang Ang.
Ang maong text daw susama og nanamilit kini sa iyang mga kauban.
“Pakisabi kay Mam Weng sorry kasi di ako nakapagpaalam. Pakisabi din na salamat sa lahat2 lalo na sa LAD . Salamat mas. Ingat kayo lage,” tipik sa text message ni Ang.