Rabacal: International container port

MIREKLAMO ang pipila ka mga manangat sa Talisay City sa pagatukoron nga bag-ong international container port kilid sa Talisay fish port. Mogasto kini og P10 bilyones. Nagtuo sila nga maka-apekto kini sa ilang panginabuhi isip mga mananagat.

Tungod niini nag-rally sila batok sa mutokod niini nga Cebu South Harbor and Container Terminal Services Corporation (CSHCTS) niadtong miaging Martes.

Nagtuo ang usa ka grupo sa mga mananagat nga mangasangit na unya ang ilang mga kahimanan sa pagpangisda ug mominus na usab unya ang ilang kuha. Ang laing grupo mireklamo nga layo na unya kaayo sila og kapanagatan tungod niining maong container port.

Nagtuo ako nga sayon ra nga masolusyonan kining ilang mga problema. Mahimo man nga mo-ayuda kanila ang CSHCTS pinaagi sa paghatag og laing trabaho o kaha livelihood project.

Dili angay babagan ug hunongon ang maong proyekto nga makahatag og tabang sa panudlanan ingon man sa mga molupyo dili lamang sa Talisay City kon dili sa tibuok lalawigan sa Sugbo.

Nakahinumdum ako sa pagbisita ni Kong. Raul del Mar sa Sitio Panagdait diin anaa karon kanang extension sa F. Cabahug St. Kaniadto kutob ra ang maong dan sa may eskina Villa Aurora. Dili gayud unta mosugot ang tag-iya sa nga himoan ug dan agi sa iyang yuta kay lagi nagtuo siya nga mahalin kini og daku. Niadtong panahuna P400 matag metro kwadrado pa ang presyo sa maong yuta sa dihang katangkungan pa kini. Apan sa dihang milagbas na ang dan hangtud sa eskina Hernan Cortes sa Mandaue City, nga proyekto ni Kong. del Mar, misulbong ang presyo sa kayutaan sa maong dapit nga sobra na sa P10 mil matag metro kwadrado. Namungingi na usab ang mga dagkung building ug negosyo sa maong dapit.

Ingon niana ang resulta sa mga dagkung inprastaktura ug negosyo nga tukuron sa usa ka dapit. Dili ikalimud nga adunay mga kasabal nga mahimo niini sa pipila ka sector sa katawhan apan mas daku ang kaayuhan ang madala niini sa kumonidad. Hinaut pang magkasinabut ang tanan aron mahinayon kining container port sa dakbayan sa Talisay.

• • •

Magpasalamat kita nga wala kaayoy danyos nga dala sa Tropical Depression Samuel sa Sugbo. Sa Metro Cebu diin gipaabut ang pagbunok sa makusog nga uwan niadtong miaging mga adlaw dala sa TD Samuel wa mahinayon.

Magpasalamat kita sa kahitas-an tungod kay wala kita mapektuhi sa bagyo apan magpasalamat usab kita sa tanang local government units (LGUs) sa pagpalihuk sa ilang disaster risk reduction units aron pagpagandam kon unsa may kadaut dala sa maong bagyo. Mao kini nakaayo karon sa atong gobiyerno ug katawhan kay nakat-on na sila og unsay angay buhaton sa mga enerhensiya labi na sa bagyo. (mannyrabacal1144@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph