UNA pa man matapos ang tuig, laing pasidungog ang nabitbit sa Davao pride nga Malagos Chocolate.
Human midaug sa Asia-Pacific competition Septyembre ning tuig, gipadala ang mga tsokolate sa Malagos sa Florence, Italy diin sila mitigi sa ubang regional winners sa ubang bahin sa kalibutan alang sa International Chocolate Awards – World Final, Oktubre 26 ngadto Nobyembre 2.
Ug tuod man, luyo sa daghan kaayong entrante sa kompetisyon, nagkadaiyang lasa sa tsokolate, wa mauwahi ang Malagos Chocolates ug nabitbit niini ang laing upat ka international awards gikan sa kompetisyon.
Sa kasamtangan anaa na sa 28 ka international ang gikuptan nila, lakip na ang usa ka Gold awards.
Ang International Chocolate Awards - World Final gianunsiyo live sa maanindot nga Palazzo Ximènes-Panciatichi sa Florence, Italy, Sabado, Nobyembre 17 ning tuig.
Sa kompetisyon, nakuha ang Silver sa Malagos 85% Dark Chocolate
(High % Plain / Origin Dark Chocolate Bars 85% and over) ug Malagos Rhum
(Dark Chocolate Ganaches or Truffles Category).
Naka-bronse sab ang Malagos Salted Caramel (Dark Chocolate Enrobed Caramels Category) ug Malagos 72% Unflavored Dark Chocolate
(Dark Chocolate Ganaches or Truffles Category).
Ubang mananaug nga nasud gilangkuban sa Estados Unidos, Finland, Sweden, Taiwan, Italy ug daghan pa.
Ang mga hurado gilangkuban sab sa mga miyembro sa Grand Jury ug international judges nga mibiyahe pa padung Florence.
Uban sab nila ang mga local chefs, journalists, bloggers ug chocolate specialists.
Sayo ning tuig, ang Malagos Chocolates mihakot og 14 ka international awards, diin lima gikan sa Academy of Chocolate niadtong Mayo, upat sa Great Taste niadtong Agosto ug laing lima sa International Chocolate Awards - Asia Pacific sa Septyembre.