ANG Asia’s Nightingale nga si Lani Misalucha ang nilingaw sa mga bisita sa Mandani Bay niadtong Martes didto sa tent sa Mandani mismo.
Naikog ko ni higalang Jingjing Mariño-Farrarons nga nangugat gyud intawn og imbitar nako pero unsaon man nga Coco Martin man ang akong peg sa pagkakaron nga sa probinsya kalagmitan magpuyo.
Basin sa sunod nga kalihukan ug kalingawan sa Mandani Bay makatambong na sab ko parehas adtong pag-light up sa upat ka Christmas tree sa atubangan. Pagkabongga sa mga dayandayan nga gimugna ni Richie Martinez.
Nalingaw mig piktyurpiktyur didto.
• • •
Nakahisgot man ta ni Coco Martin, nakatawa ko sa reaksyon sa Phil. Nat’l. Police ug sa DILG sa FPJ’s Ang Probinsyano kay dautan kuno ang paghulagway sa mga polis.
Hulat lang god mo. Moabot ra nang panahon nga mabali ang huros sa hangin. Nganong seryosohon man god na nga mugna ra man na sa hunahuna sa mga magsusulat ug ang pagkaparehas sa mga tawo, lugar ug uban pang butang sulagma man lang. Anà!
• • •
Nalingaw ang mga sakop sa E-Group sa pakigkukabildo namo sa kampyon sa The Clash sa GMA 7 nga si Golden Cañedo niadtong Biyernes. Kini human sa pagpasidungog kaniya sa iyang lungsod nga natawhan (Minglanilla) ug pagbisita sa Tungcop Elem. School ug UV Minglanilla High School.
Nagpasundayag siya sa Robinsons Galleria pagkahuman namog istorya. Bata pag linihukan ug sinultihan si Golden (16 anyos pa god) pero sinsero ug mature na ang tinubagan. Tsika kaayo, matud pa.
Di siya gusto nga mabiyaan ang pagtuon pero sa pagkakaron, ang show biz career una ang iyang atubangon kay di tanan gihatagan sa ingon nga kahigayonan. O-ha!
Niangkon siya nga dako ang kausaban sa iyang kinabuhi human sa The Clash pero nalipay ra pod siya sa mga panghitabo. Namalhin na ang iyang pamilya ngadto sa Quezon City ug naghulat nga ihatag ang iyang premyong balay (gawas sa P1 milyon ug sakyanan) aron adto na mopuyo.
Pagkabulahan! Naglikay siyag kaon og tam-is ug pag-inom og bugnaw pero di siya kabalibad kon otap ug chicharon nay idulot.
Sa pagkakaron, anaa siya sa programang Studio 7 sa Dominggo sa gabii ug naghimo na siyag album diin naka-record na siyag duha ka kanta.
Padayon sa pagkab-ot sa imong mga damgo, Golden, apan pabilin lang gyud nga nagtugkad sa yuta ang imong mga tiil. Anà!