SUSIHON sa kapulisan sa dakbayan sa Lapu-Lapu ang mga mamuhatay og pabuto sa Barangay Babag diin naila ang barangay nga maoy nag-una nga panginabuhian sa mga residente.
Niining buwana nagkataas ang demand sa maong produkto gumikan sa nagkaduol na ang Pasko ug Bag-ong Tuig.
Gipahinumduman ni PSSupt. Limuel Obon ang station commander sa Police Station 3 diin nasakop ang Barangay Babag nga mohimo og monitoring sa manufacturing sites ug ubang areas.
Gitug-an sa opisyal nga dili kalikayan nga adunay backyard manufacturer ang hilom nga mogama og pabuto gawas nga way permit, wa sab mosubay sa luwas nga paagi ingon man ang pagpatrabaho og menor de edad.
Samtang, si Lapu-Lapu City Mayor Paz Radaza mipahinumdum ngadto sa mga firecracker manufacturer nga kompletohon ang ilang mga requirement alang sa ilang business permit sa dili pa kini makapamaligya.
Gitahasan ni Radaza ang barangay opisyal nga mosusi sab sa mga tighimo kon misunod sa gipatuman nga lagda sa dili pa moluwat og barangay permit ug ubang clearances.
Naandan nga ang city police office, PNP’s Firearms and Explosives Office ug Bureau of Fire Protection makigtagbo sa grupo sa mga dealer ug manufacturer aron nga mapahinumduman sa safety procedures ug balaodnon sa matang sa pabuto nga angayang himuon.
Ang firecrackers ug pyrotechnics nga gitugot sa kagamhanan nga himuon ug ibaligya, naglakip sa baby rocket, bawang, el Diablo, judas belt, kwitis, gamay nga triangle o ubang matang sa pabuto nga gamay ra ang content sa pulbora.
Sa mga pyrotechnic device ang gi-allow mao ang butterfly, fountains, jumbo regular, luces, mabuhay, roman candle, sparkles, trompillo, whistle ug ubang mga pasiga.