MGA rehiyonal nga director sa Deparment of Environment and Natural Resources (DENR) lukop nasud gimanduan ni Environment Secretary Roy Cimatu nga nag-unang gimbuhaton nila mao ang pagpabalik sa kalimpyo sa kasapaan.
Ang di makatuman niini sud sa usa ka tuig, hayan hulipan sa katungdanan.
Kini ang hagit ni Cimatu atol sa pagbukas sa 4th International River Summit nga gihimo dinhi sa Sugbo, kagahapon sa buntag, Nobiyembre 22.
“I am directing these regional directors to make sure that all the rivers in their area will be cleaned.. .... Yung mga personnel namin napabayaan yung river. Maghahanap ako ng mas magaling sa kanila na ipapalit. Kaya take note DENR. This is really my commitment and I will be making you as one of the resources,” mando ni Cimatu.
Dugang ni Cimatu nga gikinahanglan usab ang tabang sa publiko ug sa lokal nga kagamhanan, ilabi na sa estriktong pagpatuman sa 3-meter easement, ug insaktong paghipos sa basura.
Ang kagamhanan sa dakbayan sa Mandaue ang host o organizer, tinabangan sa DENR-7 ug ang Butuanon River ang gihimong ehemplo sa IRS.
Sa iyang keynote speech, matod ni Cimatu nga ang kasapaan ang usa sa mga nag-unang responsibilidad sa DENR.
Iyang giangkon nga nakita niya kon unsa na ka-polluted ang mga sapa sa nasud.
Usa na niini ang Butuanon River, diin matod niya nga sa una niyang duaw sa Sugbo 48 ka tuig ang nakalabay, usa ang Butuanon River sa garbo sa Sugbo tungod sa kalimpyo niini.
Giangkon hinuon kini ni Mandaue City Mayor Luigi Quisumbing, kinsa sa iyang mensahe, nitug-an nga sa mga 2000, gideklarar nga biologically patay na ang sapa sa Butuanon.
“Wherein the early 2000’s the Butuanon river was declared biologically dead, and named the worst river in the Philippines... we have seen quite numbers of the violations and worsening of the river quality,” pag-angkon ni Quisumbing atol sa iyang welcome remarks.
Hinuon sugod niadtong 2016, sa iyang pagsugod sa administrasyon, gipasalmot niya ang uban sa mga kawani sa pagsalmot sa 3rd IRS sa Cagayan de Oro, aron pagkat-on unsaon nga mabanhaw ang Butuanon river.
Sukad niadto, hinay-hinay nga gihimo ang rehabilitasyon.
Gihimug-atan sa duha ka mga opisyal ang dakung tampo sa mga sapa alang sa inadlaw-adlaw nga pagpakabuhi sa mga tawo, hayupan ug mga tanum.
Award
Matod ni Cimatu nga unom ka bulan gikan karon, mohatag sila og award ngadto sa rehiyon nga adunay labing limpyo nga sapa. Ug gani promosyon pa ngadto sa mga personnel sa DENR sa maong rehiyon.
Gitambungan ang IRS sa 716 ka mga representante sa mga nagkadaiyang lokal nga kagamhanan ug stakeholders, lakip na ang 14 ka mga foreign delegates gikan sa nasud sa India, tulo3 sa America, usa sa China ug siyam sa Nethelands.