GOOD day, higala!
Ang tanang buhi moingon og, "Hallelujah!" agi'g pasalamat sa gasa nga gininhawa. Again, "Hallelujah!"
Samtang kita nagaginhawa pa, ang kinamagulangang anak sa artistang si Tirso Cruz III nga si Teejay, namatay na sa edad nga 37 niadtong petsa 21 sa kasamtangang bulan ug tuig sa sakit nga kanser.
Among silingan, 29 anyos, lalaki, guwapo, natulog og maayo, pagbangon sa kabuntagon- nadalin-as- patay diretso.
Ang anak ni ate Nilda Nadumo tarong nga nanarbaho. Gisugo "kuno" sa amo, gipa-log out og sayo bisan alas tres pa sa hapon tungod sa personal nga rason.
Nadisgrasya, gibayaran "kuno" ang nag-imbestiga- karon naproblema ang pamilya kay suweldo ug 13 month pay ra gihatag sa kompaniya. Dili ba mahadlok ang nagsugo sa yanong empleyado sa "gaba?"
Ikaw, pila nay edad nimo? Ako nag-40 last November 11, 2018. Bisan wala koy tinigum nga salapi (nakapanghulam pa gani) naningkamot og hikay ug paglipaylipay kauban akong mga higala kay kausa ra kita motungtong sa edad nga kuwarenta.
Dili na lang unta gani ko mogasto kay sayang pod ang kuwarta no? Apan kung dili na ko makamata ugma, unsa may pulos sa kuwarta nga akong tipigan? O god, magamit sa akong pamilya apan sama sa aso nga atong kumkumon- makalusot ug mahurot gihapon.
Maayo na lamang kay manggihatagon kaayo akong magulang nga si Sheila kay walay nanguling pasmo niadtong adlawa.
Daily na lang gayud kita magmapasalamaton, kabus o adunahan man, igsuon. Ang anaa lamang kanato karon grasya ug tsansa. Walay seguro kung magkauban pa kita ugma. #hallelujah!