Maguindanao massacre gihinumdom

NANGUNA si Presidential Communication Secretary Martin Andanar, Governor Esmael Mangudadatu ug Presidential Task Force on Media Security Undersecretary Joel Egco sa pagduaw sa Sitio Masalay, Brgy. Salman Ampatuan, Maguindanao Province atol sa ikasiyam nga paghinumdom sa ngilngig nga masaker sa probinsiya.

Naghalad sila og bulak, nagdagkot og kandila dungan sa pag-ampo alang sa 58 ka tawo nga niluog nga gipatay niadtong Nobyembre 23, 2009.

Niluog nga gipatay ang asawa, igsuon ug mga paryente ni Mangudadatu apil na ang 32 ka sakop sa media.

Mibisita sab sa massacre site ang pamilya sa mga biktima ug mga sakop sa media.

Nagpagawas sa ilang gibati nga kahiubos ang pamilya sa mga gipangpatay gumikan hangtud karon ngitngit pa gihapon ang hustisya sa mga biktima.

Gikanayon ni Mangudadatu nga dili sila mosurender ug moatras hangtud nga makab-ot nila ang tinuod nga hustisya sa mga biktima ug kasilutan ang mga suspek.

Nagpasalig sab si Secretary Andanar ug Egco nga sila maningkamot nga makaangkon na og hustisya ang mga biktima sa 2019 gumikan gipatutukan na ni Presidente Rodrigo Duterte ang kaso sa masaker sa Maguindanao. (Edgar E. Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph