ILUSAD sa Lunes sa sunod semana ang biyahe sa pasiunang 22 ka bag-o ug moderno nga jeepney units sa dakbayan sa Sugbo.
Mga opisyal gikan sa Department of Transportation (DOTr) ug Land Transportation Franchising and Regulatory Board (LTFRB) motambong sa kalihokan nga sugdan og motorcade caravan sa alas 8 sa buntag ug alas 10:30 sa buntag ang programa sa Robinson’s Galleria.
Matod ni Jericho Mari Jumapao, bag-ong chairman sa Cebu Integrated Transport Multipurpose Cooperative (Citrasco), kinatibuk-ang 40 ka air-conditioned nga jeep pasaheroan nga gipanag-iya ug i-operate sa Persano Corporation (PC), magbiyahe dinhi sa Sugbo, apan nadelatar ang pagkarga sa ubang units tungod sa bagyong Samuel.
Sumala niini nga ang Citrasco ning-ayuda sa PC nga nagbase sa Quezon City, aron makasugod og operate dinhi sa Sugbo.
Si Jumapao nipahibawo nga sa Martes magsugod na ang operasyon sa maong PUJ units nga kabahin sa Public Utility Vehicle (PUV) Modernization Program sa DOTr ug LTFRB.
Sumala ni Atty. Vigor Mendoza, chairman sa PC, gipili nila ang siyudad sa Sugbo sanglit usa kini sa nag-unang mga dakbayan sa nasod.
Siya nidugang nga duna na sila’y franchise permit gikan sa LTFRB 7 samtang ang Cebu City Transportation (CCTO) ang moisyu sa travel line nga subayon niini.
Sigon ni Reynaldo Elnar, assistant regional director sa LTFRB 7, nga wala pa maaprobahi sa ilang ulohang buhatan ang petition sa Citrasco nga nangayo og P15 nga pletihan alang sa maong mga PUJ unit.
Mahimo hinuon kini makabiyahe og sugod apan mogamit sa pletihan sa ordinaryong mga jeep pasaheroan nga tag P6.50 ang minimum.
Si Elnar niingon ang modernong mga PUJ units kay mosubay sa duha ka bag-ong mga rota nga giablihan.
Ang unang rota manukad gikan sa Cebu City Hall, moagi sa Robinson’s Galleria dayon sa Cebu Business Park lahos sa Asiatown I.T. Park ug pabalik.
Samtang, ang ikaduhang rota, gikan sa Paseo Arcenas sa Banawa, moagi sa may Happy Valley lahos sa B. Rodriguez, Fuente Osmeña, modiretso sa Ramos, dan D. Jakosalem, Gorordo Avenue, moagi sa Ayala, dayon sa Panagdait sa may Landers, lahos sa Sykes ug pabalik.
Si Jumapao namahayag nga gipili ang mga rota diin diin dunay mga kompaniya sa business process outsourcing (BPO) aron daghang mga call center agents ang maserbisyohan.
Ang maong jeepneys kay susama og mini bus nga ang pultahan naa na sa tuong bahin, dunay 25 seating capacity apan maka-accommodate og 10 ka mga pasahero nga magbarog ug ang mga lingkuranan nag-atubang sa drayber.
Aduna usab kini libre nga wi-fi, speed limiter, 72 ka oras nga dash cam, Global Positioning System (GPS), closed-circuit television camera ug automated ang pagkolekta sa pletihan.
Apan nagkanayon si Jumapao nga sa pagkakaron cash lang una ang gamiton sa pagpleti sanglit mangita pa og supplier og cards ang PC alang sa automated fare collection.