LIKAYE ang Fuente Osmeña aron di ka malangay sa imong pagbiyahe ugmang adlawa, Dominggo, Nobiyembre 25.
Sugod alas 3 sa hapon, ang Cebu City Transportation Office (CCTO) mosirado sa Fuente Osmeña aron paghatag og espasyo sa Eucharistic celebration ug solemn procession sa Solemnity of Christ the King.
Gawas sa pagsirado sa Fuente Osmeña, apektado usab ang mga lane sa Osmeña Boulevard paingon sa downtown Cebu City hangtod sa Metropolitan Cathedral gumikan sa procession.
Si Francisco Ouano, operations head sa CCTO, nihangyo ngadto sa publiko nga patas-an ang ilang pasyensya sa higayon nga malangan ang ilang pagbiyahe gumikan sa maong relihiyusong kalihukan.
Base sa traffic advisory nga gipagawas sa buhatan ni Ouano ug napatik usab sa Facebook page sa CCTO, ang mga public utility jeepneys (PUJs) gikan sa Banawa ug Guadalupe nga mopaingon sa Carbon area adto moagi sa V. Rama, liko sa wala paingon sa J. Alcantara Street/N. Bacalso Avenue (gawas sa 06A ug 07A) liko sa tuo paingon sa Leon Kilat ug lapos sa dalan Magallanes paingon sa ilang destinasyon.
Ang mga PUJ gikan sa Lahug, Apas ug Ayala nga moagi sa N. Escario Street, moliko sa wala paingon sa Juana Osmeña, right turn sa Gen. Maxilom Avenue ug paingon sa dalan F. Ramos ug sundon ang mga signs nga gibutang sa CCTO.
Ang mga de pasaheroan gikan sa Pit-os, Talamban samtang niagi sa dalan Colon adto moliko sa V. Gullas, right turn sa D. Jakosalem ug balik sa ilang orihinal nga rota.
Ang mga PUJ gikan sa Bulacao, Inayawan , Pardo, Mambaling, Labangon nga moadto sa Colon adto moagi sa Leon Kilat ug kasikbit nga karsada paingon sa ilang padulngan.
Ang mga trucks, vans, trailers ug ubang sakyanan nga gikan sa south Cebu nga mopaingon sa SM o North Reclamation Area mo-right turn sa Mambaling road paingon sa SRP ug agi sa tunnel paingon sa Sergio Osmeña Avenue.
Ang mga sakyanan gikan sab sa NRA paingon sa south adto moagi sa S. Osmeña Avenue, subay sa tunnel paingon sa SRP samtang ang gikan sa Talisay mosubay sa CSCR, SRP ug tunnel. PAC