KOMPIRMADO nang mag-uban og balik sila si Manny Pacquiao ug Hall of Fame trainer Freddie Roach alang sa umaabot nga tahas sa Pambansang Kamao sa Pilipinas batok kang African-American Adrien Broner karong Enero sa sunod tuig sa MGM Grand Garden Arena sa Las Vegas, USA.
Sa usa ka text message ngadto sa Sports Illustrated, gibutyag ni Roach nga nakigsulti na kaniya si Pacquiao kabahin niini.
“Manny reached out directly. We sat together one-on-one. I’ll be in his corner (on) Jan 19,” pagbutyag ni Roach.
Nag-post sab ang 58 anyos nga si Roach sa iyang Instagram account og hulagway nga nag-uban sila ni Pacquiao, timailhan lang ning maong kalambuan.
Si Pacquiao nakadesisyon nga dili kuhaon si Roach sa dihang nangandam kini sa away batok kang Lucas Matthysse niadtong Hulyo diin midaog ang 8-division world champion pinaagi sa TKO.
Apan ning higayuna, mismong si Pacquiao ang nipadayag sa iyang intensyon nga kuhaon pagbalik si Roach.
“This fight is going to be a good fight. I have to pass through (him) before fighting Floyd Mayweather,” matod ni Pacquiao.
“I want to prove to the boxing fans that Manny Pacquiao is still in the pack.”
Si Pacquiao naggunit og 60-7, 39 KOs nga rekord samtang si Broner adunay 33-3, 24KOs nga baraha. AFP, ESL