NAPASULOD ni Klay Thompson ang iyang put back shot gikan sa kaugalingon niyang sipyat nga itsa sa nahabiling lima ka mga segundos aron agakon ang host Golden State Warriors sa 117-116 nga kadaugan batok sa Sacramento Kings sa National Basketball Association (NBA) kagahapon.
“I don’t know if I got fouled, but who cares I got the putback,” matod ni Thompson.
“You’ll take a game-winner any way you can get it I don’t care how ugly it is.”
Ang kadaugan sa back-to-back defending champions gipangulohan ni Kevin Durant pinaagi sa iyang 44 puntos samtang nidugang og 31 puntos si Thompson.
Kini maoy ikaduhang sunodsunod nga duwa nga parehong napuntos sila si Durant ug Thompson og 30 puntos o mas taas pa, nga igo na kaayo aron matapakan ang haw-ang nga nabiyaan sa naangol nga si 2-time MVP Stephen Curry.
Wala pa sab gihapon makaduwa sa Warriors ang ilang pambato sa depensa nga si Draymond Green, kinsa aduna sa’y angol.
Ang Warriors ningsaka sa 14-7 nga rekord aron ilugon og balik ang liderato sa Western Conference samtang ang Kings nangadakin-as sa 10-9 nga baraha.
Ang mingyukbo nga Kings gipangulohan ni Buddy Hield pinaagi sa iyang 28 puntos samtang nihatag og 20 puntos ug 17 rebounds si rookie Marvin Bagley III.
Taliwala sa ilang kapildihan, ang Kings mapasigarbuon sa ilang gipakitang duwa.
“That was a very good basketball game to watch, to be a part of. I thought we competed our tails off,” matod ni Kings coach Dave Joerger.
Dili lalim ang naagian sa Warriors una nila naangkon ang kadaugan, gani sa naggukod sila og unom ka mga puntos, 108-102, sa nahabiling 6:44 minutos.
Human niini, ang Warriors nakamugna og 11-0 nga rally, walo niini gimugna ni Durant, aron ilugon ang labaw, 113-108, sa nahabiling 3:51 minutos.
Ang three-point shot ni Hield maoy nakapukaw sa opensa sa nahinanok nga opensa sa Kings ug nagpahak sa labaw sa Warriors, 113-111, sa nahabiling 3:39 minutos.
Nakapuntos na sab si Hield pinaagi sa layup aron tablahon ang duwa, 113-113, sa nahabiling 2:25 minutos.
Sa nahabiling 26 segundos, ang Kings nakahigayon pag-ilog sa labaw, 116-115.
Gikan sa timeout, si Durant nasipyat sa iyang jumper ug maayo na lang kay nakuha sa iyang kauban nga si Andre Iguodala ang offensive rebound.
Ang nagsunod nga senaryo mao na ang mabayanihong put back shot ni Thompson.
Sa laing bahin, hapit nang makabalik og duwa si Curry, kinsa two-time MVP.
Gisusi og balik ang pagpaalim ni Curry sa angol sa iyang tiil kagahapon ug nasuta nga posibleng makaapil na siya sa praktis sa Warriors sa sunod semana. (AP, ESL)