MISULOD na sa Davao del Sur, ug paingon na diri sa dakbayan sa Davao kining gikagubtan nga usa ka grupo nga rehistrado suma pa sa Securities and Exchange Commission (SEC) nga nakabase sa Purok 8, Poblacion, Alabel, Sarangani Province.
Kitang tanan, pwede nga mohatag og donasyon sa panahon nga kita mosimba ug bisan kung wala kita sulod simbahan basta ang nangayo og donsyon sakop kita sa maong relihiyon, pero kining usa ka grupo sa simbahan, gigamit ang relihiyon pero walay kaugalingong simbahan sa laktud bisag unsay imong relihiyon pwede kang mo-donate.
Sa ilang certificate of membership, walay nakasulat kong unsang klase sa negusyo ang ilang gipadagan, ug walay nakasulat nga 30 porsiyento ang tubo sa imong gidonar.
Pero dinhi ta karon sa pulong "donasyon" lahi kini sa puhonan o investment.
Ang pulong donasyon, wala kay paabuton nga ganansiya tungod kay imong gidonar ang imong kuwarta, wala kini kalainan nianang usa ka relehiyon nga magdala og trompa sa atong mga merkado publiko nga magwali-wali sa pulong sa Diyos gikan sa bibliya, pagkahuman dunay maglibot-libot aron mangayo og donasyon.
Naa sab mga batan-on nga mosaka sa mga bus mobasa lang og mga bersikulo sa bibliya, pagkahuman manghatag og sobre para donasyon nga wa gani ta mahibalo og unsay ilang relihiyon.
Mahimong pakonswelohan mo sa kuwarta nga inyong gidonar, pero sa kadugayan dili namo makadawat, ngano? Bangko nga negusyo, dili gani mahatag ang 30 porsiyento nga tubo, sila pa? Sa imong pagdonar, wala ka mahibalo kung unsay ilang negusyo basta kay mo-donate kalang.
Pagmata na, kay ang SEC ug Departrment of Interior and Local Government (DILG), nag-awhag nga ipahunong ang pagpanguleksyon ning maong sekta.
Timan-i dili tanang legal, moral; adunay legal pero, immoral, sa laktud, adunay legal pero "scam" mao kini ang angay natong bantayan, kay matud pas panultihon “walay mangilad kung walay magpa-ilad.”
Ang donasyon hatag kana, ang puhonan negusyo, pero alang nako kining modus sa usa ka sekta sa simbahan, mura'g scam kini, magbantay kita, di magpailad.