SA NAKALABAY nga Biyernes pormal na nga giablihan ang week-long celebration sa Pasko Fiesta sa Davao City.
Una pormal nga gibuksan ang programa nagpadayag og kalipay si Davao City Mayor Sara Duterte-Carpio ug mibutyag kini sa tinuod nga simbolo sa Pasko.
"Ang Pasko usa ka pagsaulog nga kitang tanan magmaya, magpasaylo sa usa'g usa, ang pagdalit sa grasya ug ang labaw sa tanan ang pagpasalamat nato sa Ginoo," tipik sa gisulti sa mayor.
Sa maong okasyon, way kabutang sa gibati nga kalipay sa mga tawo nga misaksi sa pag-abli sa kaugdahan dihang misiga ang dako nga Christmas Tree ug mihayag ang palibot sa Rizal Park, padung sa Osmeña Park ngadto na sa mga nagdula-dula nga mga suga nga nanglihok sa building sa City Hall.
Ang lokal nga kagamhanan sa Davao City matag tuig kining mogahin og badget alang niini nga okasyon, gikan sa mga adorno sa kahayag sa pasko palibot sa balay-dakbayan ngadto na sa mga pahalipay sa empleyado ug sa katawhang Dabawenyo.
Gikan pa sa pagka Mayor ni Pangulong Rodrigo Duterte, ingon niini na ang sitwasyon, -- ang paghatag og pahalipay sa Dabawenyo.
Gani ang pamaagi sa maong okasyon nakopya na kini sa ubang mga lugar sa Pilipinas kay ilang nakita nga bisan sa gamay nga pamaagi madalit sa katawhan ang tinuod nga hatud sa Pasko.