SUPERBALITA CAGAYAN DE ORO

Todino: Pro Bono

DILI na unta kinahanglan mangugat pa ang kalihim sa Department of Environment and Natural Resources (DENR) sa kampaniya niini nga malimpiyohan ang atong mga sapa.

Bag-o lang adunay kamandoan si DENR Secretary Roy Cimatu sa tanang regional directors sa DENR nga limpiyohan ang tanan sapa ug suba diha sa ilang hurisdiksiyon.

Gihatagan ni Cimatu og usa ka tuig ang mga regional directors pagtuman sa maong direktiba. Ang mapakyas mag-atubang og silot ug posibling tantangon sa katungdanan.

May kamandoan o wala, batakang katungdanan kini dili lang sa DENR apan sa tanang local government units (LGUs) paglimpyo sa atong palibot.

Paglingkod ni Presidenti Rodrigo Duterte sa Malacañang, nakita dayon ang kalainan sa kahapsay ug kalimpyo sa Metro Manila. Mga estero, sapa, ug mga karsada gipanghawanan ug gipang-ugkat ang mga basura nga nagtipon-og sa dugay'ng panahon.

Nahimo didto sa kaulohan ug nanakod kini sa ubang dakbayan ug probinsiya. Apan, wa hingpit sagopa sa tanang LGUs. Kon ngano wala gihimo sa uban, atong mga mayor ug gobernador ra gyud ang makatubag.

Lisod ba gyud ipatuman kining pagpanglimpyo sa sapa?

Naa man kining balaod nga magsilot niadtong magpataka og labay og basura. Unya kompleto sab sa mga kawani og ekipo atong mga dakbayan paglimpiyo sa mga sapa. Unsa pa may kuwang?

Sa tinuod ang dakong babag niini mao ang kakuwang og disiplina sa mga tawo ug kakuwang sa “political will” sa atong mga opisyal.

Hunahunaon unta nila ang makatagbaw nga resulta kon limpyohan nato ang mga sapa.

Sa usa ka dapit sa Japan, adunay ilang “drainage” o kanal, tungod sa kalimpyo makita pa nimo ang mga isda. Sukwahi dinhi sa Pilipinas, mga basura ang naglangoy langoy.

Kining pagpanglimpyo maoy usa ka labing yano ug simple nga programa nga dali ra kaayo ikapatuman. Kon dili makahimo niini ang DENR o mga LGU, wa sila’y katarungan nga magpundo diha sa ilang katungdanan.

Kining mga tawo usab, palihug lang tabangi pud og disiplina inyo kaugalingon, bisan kanang putos sa candy ayaw ninyo ilabay sa bisan asang dapit.

Isipa lang nga kining sapa ug karsada maoy inyong sala o kusina kung magpadayon ka’g labay sa basura, dili naka makatikang sa imong salog kay puno na sa hugaw. Gusto ka ana? Kahugawan baya nimo oy.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph