GIKATAHO nga mokabat ngadto sa 600 ka mga sakop sa Armed Forces of the Philippines (AFP) ang i-deploy sa Bureau of Customs (BOC) lukop-nasud aron mohimo og intelligence and counter-intelligence operations aron mahunong ug mapakgang ang grabeng kurapsiyon sa maong ahensiya. Karong bag-o nasentro na usab ang BOC sa kontrobersiya human makalusot ang P6 bilyones nga kantidad sa shabu dinhi sa nasud. Panahon na kini ni BOC Commissioner Isidro Lapena.
Pipila ka buwan ang nakalabay, laing hugna sa illegal nga drugas nga nagkantidad og P6 bilyones nakalusot gihapon sa Manila port. Panahon kadto ni Commissioner Nicanor Faeldon. Inay silutan, igo lang gibalhin si Lapema ngadto sa Tesda samtang si Faeldon toa sa Bureau of Corrections isip director sa National Bilibid Prisons.
Kanang sindikato sa maong buhatan, lisud na kanang bungkagon. Naa man god diha ang kuwarta. Asa tong ahensiya nga daghang kuwarta labi sa mga revenue earner agencies sama sa Bureau of Internal Revenue (BIR) naa gyud nang kurapsiyon.
Ang kuyaw ani kon malamoy ang mga sundawo sa sistema. Ang buot nakong ipasabot nga basin matental sila sa kurapsiyon gumikan sa dako nilang kitaon. Sa iningles pa; “If you cannot lick them, join them.” Lipaton lang nang mga sundalo sa mga kurakot diha sa maong ahensiya.
Sumala og unsay nahitabo sa Muntinglupa. Sa pag-asumir ni Presidente Duterte naukay ang maong bilangguan gumikan kay didto ang tinubdan ang illegal nga drugas. Gitumbok nga si kanhi Justice Seretary ug karon Senador Leila De Lima ang nagpaluyo nga maoy hinungdan sa iyang pagkabilanggo.
Gihulipan ang mga jail officials ug mga jail guards sa mga sakop sa Special Action Force (SAF) sa PNP.
Nadestino pa si kanhi PNP chief Ronald “Bato” Dela Rosa isip director sa Bureau of Corrections human siya mo-retiro sa PNP. Unya nasulbad ang problema? Wala. Ang ubang mga sakop sa SAF nalamoy na hinuon sa sistema ug miapil usab sa mga binoang gumikan kay natental. (bobbygnalzaro@gmail.com)