NUNOT sa pagbag-o sa panahon, moderno na usab ang gamit sa tawo. Sayon na lang kaayo mokontak sa bisan kinsa bisa'g gawas sa nasud pinaagi sa cellphone.
Kung kaniadto talagsa ka ra motan-aw og sine kay mahal, karon puwedeng adlaw-adlaw o matag takna pinaagi sa internet ug social media.
Anaa na ang microwave oven ug induction stove kung gusto daling moluto, computer printer kung gusto mokopya og dokumento, mga smart gadgets, inverter nga aircon, drone, CCTV ug daghan pang uban.
Anaa nay sakyanan nga gigamitan og elektrisidad ug hydrogen nga wala nagkinahanglan ug lana.
Apan sa paglambo sa teknolohiya sa nasud, anaay mga problema nga lisud sulbaron sa modernong teknolohiya sama sa paghipus sa basura ug paghuot sa trapiko. Ang tanang modernong siyudad sa kalibutan nakasinati niini.
Kung lantawon sab nato ang atong baybayon gikan sa eroplano, atong makita sa ubos ang linya sa basura nga naglutaw sa dagat ilabi na sa daplin sa mga siyudad sa atong nasud. Mao kini ang atong makita nga toneladang basura nga gibanlas pagbalik sa Quezon Boulevard sa Manila nga ginahakot sa MMDA.
Mao pod dinhi sa Davao apan maayo na lang ta diri kay abtik ang atong CENRO nga naghakot sa basura sa regular nga panahon bisan tuod wala matuman ang segregation sa basura.
Sa laing bahin, may kaila ako nga taga Brunei nga diriyot namatay sa trapiko sa Manila. Una pa niyang pagbisita sa nasud aron motambong sa usa ka event sa dako nga hotel sa Quezon City.
Dako ang iyang kalipay nga nitugpa na ang iyang gisakyang eroplano sa NAIA apan sa pagsakay na niya'g taxi, niabot ug sobra lima ka oras ang iyang biyahe gikan sa airport hangtud sa iyang hotel.
Medyo taba ang akong kaila ug halos di na siya makaginhawa sulod sa taxi sa kadugay sa biyahe. Maayo na lang nga nakadala'g tambal ang iyang alalay mao nga nadali ra sab siyang naulian apan matud pa niya, bisa'g pakapinan og litson, dili na siya mobalik sa Manila.
Bisan dinhi sa Davao grabe na sab ang trapik hasta ang pagparada sa sakyanan. Unta ibalik na ang pagbayad sa parking fee sa dalang publiko aron kadtong mobayad maoy makaparking dili pareha karon nga mora'g ilang kaugalingong paradahan na ang dalan.
Nindot ug hapsay na ang dalan atubangan sa San Pedro Police Station human atong gituki dinhi sa Nota Bene nga giparadahan kini'g pipila lamang ug mga daut nga sakyanan.
Unta anaay negusyante nga mo-invest sa modernong public parking center nga kaadtoan sa tawo kay di na mabangbang ang kahuot sa dalan.
Dako sab ang problema sa daut natong traffic lights. Imbis nagkamoderno, nibalik sa karaan nga sinyas sa kamot na man hinuon ang atong makita.
Hastang luoya sa mga taga Davao City Traffic Management Operations Office kay ila ang tanang init, ulan, abog, balikas kung magtrapik. Kanus-a man ni maayo?