SUPERBALITA CEBU

Personal ang motibo sa pagpusil-patay sa 2 ka pulis sa Talisay?

PERSONAL nga atraso ug posibling may kalabutan sa ilang kanhi trabaho ang usa sa gitan-aw sa kapulisan sa pagpusil-patay sa duha ka mga retiradong pulis sa siyudad sa Talisay sa miaging kagabii, Nobiyembre 26 sa Tabunok, dakbayan sa Talisay.

Lawom nga imbestigasyon gimando sa hepe sa Cebu Provincial Police Office (CCPO), Sr. Supt. Manuel Abrugena, ngadto sa Talisay City police station.

Ang mga biktima mao sila si retired SPO1 Edgar Causon, taga Talisay, ug retired SPO4 Ferdinand Navales.

Usa sa mga gitan-aw nga motibo karon sa kapulisan ang may kalabutan sa ilang personal nga kinabuhi lakip usab sa ilang subayon ang posibling ang kanhi nila trabaho isip mga sakop sa PNP.

Sa wala pa moretiro sa ilang katungdanan ang duha ka mga pulis pulos sila nadestino sa Provincial Anti Illegal Drug Special Operation Task Group sa probinsya sa Sugbo.

Si SPO4 Navales miretiro niadtong Septiyembre 1, 2013 isip optional samtang si SPO1 Causon miretiro niadtong 2017 ug wala matino unsay ilang rason sa ilang pag-undang sa ilang trabaho.

“Tinitingnan po natin dito yung kanilang involvement din sa mga previous assignments nila kung ano yung kanilang activities,” matod ni Abrugena.

Lakip sa ilang sutaon sa imbestigasyon nganong nag-uban ang duha ug unsay ilang gihimo sa wala pa mahitabo ang pagpamusil.

Apan sa pasiunang impormasyon nga nadawat sa Talisay police station kanunay na nga mag-uban ang duha nga makita nga mangape sa usa ka mall nga nahimutang sa Barangay Bulacao. Posible nga gisundan na sa killer sila si Causon ug Navales.

Matod ni Abrugena, wala nila wad-a ang posibilidad nga adunay drug personalities sa Talisay ang nasuko sa duha sa dihang aktibo pa kini sa serbisyo tungod kay pulos sila naa nadestino sa unit nga naggukod sa mga nalambigit sa ilegal nga drugas.

Wala pa masayod si Abrugena kung aduna bay kasong administratiba nga giatubang ang duha ka mga kanhi pulis.

Duha ka mga lalake nga luwan sa motorsiklo ang giingong nipusil sa mga kanhi pulis sa makadaghang higayon bisan sa kadaghan pa sa mga tawo niadtong tungora sa Barangay Bulacao, Talisay.

Gimandoan usab ni Abrugena ang mga imbestigador nga subayon kung aduna bay mga CCTV camera sa dapit nga posibling nakakuha sa panghitabo aron makatabang sa ilang himuon nga imbestigasyon.

Wa pa mailhi sa kapulisan ang duha ka lalaki nga ga-motor.

Sa sayo pa, si Supt. Marlu Conag, hepe sa Talisay Police, nitug-an sa Superbalita Cebu nagkanayon nga tulo ka angulo ang ilang gisubay sa imbestigasyon.

Unang angulo ang alegasyon sa land dispute ni Navales.

Ikaduha ang alegasyon sa kalambigitan ni Cauzon sa druga.

Ikatulo ang pagkasakop kaniadto sa duha ka mga biktima saserbisyo sa pagkapulis nga dunay nagdumot.

Si Conag nidugang nga si Navalez nasakop kini kaniadto sa Talisay Police niadtong 2006. Samtang si Cauzon, nasakop kini sa Pardo Police station sa dakbayan sa Sugbo niadtong 2016.

Matod ni Conag, nagpadayon pa ang ilang imbestigasyon og nagpaabot sa pagproseso sa taga Soco sa mga nakuhang ebidensiya. AYB, GPL


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph