TAMBAG sa kapulisan, kon mag-inom og ilimnong makahubog, kutob lang sa tiyan ug di ipalahos sa utok.

Kini human nga usa ka 33- anyos nga lalaki ang patay dihadiha dayon human gidunggab makadaghang higayon ug gigulgol ang liog sa suspek nga hubog.

Ang biktima giila nga si Wilrey Caputolan, lumad nga taga Barangay Quisol, siyudad sa Danao.

Ang suspek giila nga si Adelito Bacus, 38, ug lumad sa usa sa mga lungsod sa probinsya sa Sugbo.

Ang duha pareho nga nag-abang lang og lawak sa Barangay Basak, dakbayan sa Mandaue ug pagpanunggab nahitabo sa dan H. Abellana sa naasoy nga dapit.

Matod ni Police Senior Inspector Rodgene Fudotan, hepe sa Basak Police Station, nga nadawat nila ang alarma sa pagpanunggab, alas 3:40 Dominggo sa hapon, Nobiyembre 25.

Sa gihimong inisyal nga pakisusi sa kapulisan, giingong nakig-istoryahanay si Caputolan ug Josie Madriaga, 52, molupyo ra sa maong dapit, sa dihang kalit nga niabot si Bacus dala ang usa ka kutsilyo.

Giingong kalit niini nga gidunggab sa dughan si Caputolan. Sa dihang natumba kini, gidunggab pa niini ang bukobuko, dayon giluglog ang liog nga hinungdan sa hinanaling kamatyon ni Caputolan.

Ang saksi nga si Madriaga ang wa nay nahimo kundi nidagan palayo.

“Hubog daw kaayo ang suspect, nagdala na og kutsilyo, pag-abot sa nahimutangan sa biktima, nisyagit ang suspect og ‘buang ka,’ dayon dunggab sa biktima,” asoy ni PSI Fudotan sa Superbalita Cebu.

Usa sa gitan-aw sa kapulisan nga aduna nay kanhi bangi ang duha, nagkalalis diha sa kanhi nila panag-inom.

Gadumot si Bacus, ug nabalik ang kalagot sa dihang grabe na usab kini kahubog.

Gisusi pa sa kapulisan kon unsay giawayan ni Caputolan ug ni Bacus nga niresulta man sa linuog nga krimen.

Kasong murder ang giandam na nga kaso batok kang Bacus, kinsa nasikop ra usab dayon sa kapulisan, human nga yano kini nga nilakaw palayo sa crime scene, sa dihang naseguro niya nga patay na si Caputolan.

Si Fudotan subling nipasidaan sa publiko nga dili magpalabi og inom sa ilimnong makahubog aron walay kamahayan sa kaulahian.