Diputado: Ang Panglao Airport

KINSA man gyod ang angayan nga moangkon sa kalamposan sa pagsubo sa Panglao Airport kagahapong adlawa?

Si Gobernor Edgar Chatto ba?

Si Gobernor Rene Relampagos ba?

Si Gobernor Erico Aumentado ba?

Si Gobernor David Tirol ba?

Si Gobernor Constancio Torralba ba?

Para nako, silang tanan dunay dakong natabang sa maong proyekto busa angay silang tanan ang pasalamatan.

Maot paminawon og mogawas nga bakak kon angkonon lang sa kasamtangan nga pamunoan sa probinsiya karon ang tanang “credit” sa maong proyekto.

Buyno, ang pabor lang nila kay sila ang naglingkod karon sa renda sa pangagamhanan, kutob ra pod diha.

• • •

Og kon hunahunaon, kalamposan sa tanang mga Bol-anon ang maong proyekto tungod kay daghang mga tawo ang nakatabang nga matuman ang maong proyekto.

Sama sa mga tag-iya og yuta nga naapil sa maong proyekto. Ilang gibaligya ang ilang yuta sa ubos nga kantidad aron magamit kini sa maong proyekto.

Gawas lang adtong mga gwatsi nga nakasapi sa maong transaksiyon pinaagi sa pagpalit og barato og sa pagbaligya niini og mahal ngadto sa lalawigan.

Gawas lang adtong mga konsabo nga mga abogado nga nakasapi og maayo tungod sa “pakapin” nga mga kalihokan sa pag-gama ug sa pag-notario sa mga dokumento.

Og gawas lang adtong mga opisyal nga maoy nag-amuma sa mga panapi sa pagpamalit og yuta nga barato og pagbaligya niini og mahal.

Kini sila dili angay pasalamatan.

Angay pa gani silotan.

• • •

Bakikaw paminawon sa usa ka politiko nga perteng naka-atake sa pagkatawo sa usa ka kandidato sa 2016 sama ni Digong Duterte unya karon mona-monang paningkamot nga makaduol ni Digong.

Kusog modaot sa pagka-tawo ni Digong nga kuno berdugo sa Davao, maoy tigpasiugda sa vigilante killings, sa Davao Death Squad ug sa uban pang mga salawayong buhat.

Unya karon, magsuhid-suhid na sa kumo ni Digong, mag-ilog pa og tapad ni Digong para makuha sa picture nga nagtapad sila ug labi sa tanan, magkumpayot aron lang makakuha sa ilang hulagway nga tapad o kauban si Digong.

Dili ba bakikaw?

• • •

Human sa Boracay, Panglao, Bohol na sab kuno ang isunod.

Buot ipasabot, nalimpiyo na man ang Boracay, ang kabaybayonan na sab sa Panglao, Bohol ang sunod nga limpiyohan.

Nindot kini.

Ang wala mahimo sa lokal nga pangagamhanan himuon na karon sa pangagamhanang nasyonal aron masulosyonan ang mga kalapasan sa balaod sa kinaiyahan.

Pananglit, kadtong milapas sa 20-meter salvage zone, angayan lang nga silotan base sa gimando sa balaod.

Daghang mga kalapasan ang gihimo sa mga resorts ug restaurants didto sa Panglao sanglit magtukod sila sa ilang mga building duol na man kaayo sa lapyahan sa mga balod. Supak kini sa balaod.

Daghan usab didto ang walay klaro nga “waste water treatment facilities” og magpabuhagay na lang sa ilang hugaw ngadto sa dagat.

Mao kini ang hinungdan nga hugaw ang kadagatan og dili safe nga kaligoan tungod kay kon magpadayon kini, segurado nga mosaka ang coliform sa dagat. Mangatol na ang mangaligo sa dagat og madaot ang ilang kalawasan sa katol.

Alang kanako, good news kining ilang plano nga pagabuhaton sa Panglao, Bohol.

• • •

Mabasol ba si PRRD kon atakehon niya og balik ang mga kaparian og kaobispohan?

Kon kalingawan lang og atake si PRRD, siyempre dili sab nindot paminawon nga himoon lang siyang punching bag.

Wala ilha sa mga kaparian ug kaobispohan ang “separation of church and state” kon moatake sila ni PRRD.

Apan kon mobalos na si PRRD, kining “separation of church and state” mao dayoy ilang ipasangil sa mga kaparian.

Maayo tingali irepaso na sab sa kagamhanan ang gihimo sa unang mga administrasyon nga kobrahan og buhis ang tanang negosyo sa simbahang katoliko.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph