GIHATAGAN og pahalipay sa Provincial Treasurer’s Office sa Misamis Oriental ang top five real property taxpayers sa Misamis Oriental.
Atol sa pagpakayab sa nasudnong bandili, ang naasoyng buhatan nag-identify ug lima ka mga kompanya sa lalawigan nga sakto mobayad sa ilang buluhisan.
Ang mga awardee giulohan sa FDC Misamis Power Corporation, nga gisundan sa Minergy Power Corporation, Holcim Philippines Corporation, Coca-Cola Femsa Philippines Inc., ug Steag State Power Inc.
Si Juan Eugenio Roxas, presidente ug CEO sa FDC maoy nidawat sa plaque of recognition, human makabayad sa mikabat P60,698,039.72 nga buwis.
Samtang si Engr. Gaudencio Bascon, Jr., ang plant manager sa Minergy, midawat sab sa maong plaque, human makabayad sa mikabat nga P40,249,340.96.
Gidawat sab ni Ms. Michelle Angelie Galarpe, corporate social responsibility head sa Holcim, ang plaque human ang maong kompanya nakabayad sa mokabat P24,017,746.88 nga buhis.
Ang representante sa Coca-Cola na si Noel Anore, cost and inventory executive, ang midawat sa maong pasidungog, human sila makabayad sa P10,878,811.14 nga buwis.
Samtang, si Manny Leuterio, community relations officer sa Steag, ang midawat sa plaque, human kini nagbayad sa mikabat P7,160,936.25 nga buluhisan.
Gibutyag ni Misamis Oriental Governor Yevgeny Vincente Emano nga angayan maila sa lalawigan ang mga kompanya nga dako og tabang sa kalamboan sa Misamis Oriental.
Samtang una sab niining gipaabot nga unta kadtong mga kompanya nga hangtod karong panahona nagpabiling buta ug bungol sa pagbayad sa ilang responsibilidad isip usa ka taxpayers. (SVB)