BAKAKON maoy paghulagway sa kampo sa depensa batok sa star witness sa pagpatay ni Bien Unido Bohol Mayor Gisela Boniel nga si Riolito Boniel sa dihang gipa-ubos sa laing hugna sa cross examination niadtong Nobiyembre 23, 2018.
Usa sa gisanglitanan ni Atty. Romero Boniel, abogado ni kanhi Bohol Provincial Board Member Niño Rey Boniel, nga wa motukma ang pamahayag ni Riolito sa taho sa Superbalita Cebu atol sa mga na-unang pag-interview kaniya.
Nasayran nga first degree cousin sila si PB Boniel (sinumbong) ug Riolito (saksi), samtang paryente sab sa duruha si Atty. Boniel.
Diha sa witness stand atubangan ni Regional Trial Court Judge Ferdinand Collantes, si Riolito nangangkon nga nakakita ni PB Boniel nga miti-on sa armas tumong sa ulo sa iyang misis dayon pusil samtang sakay sa pumpboat nga naglawig paingon sa kadagatan sa isla sa Olango, niadtong Hunyo 7, 2017 sa kadlawon.
Apan ang abogado mikuwestiyon sa maong saksi nga lahi ang pamahayag niini sa taho sa nahisgutang local nga pamantalaan nga nagkanayon nga wa siya makakita sa pagpusil kay na-busy siya sa pag-atiman sa makina sa pumpboat niadtong tungora.
Pakyas si Atty. Boniel sa pag-presentar og kopya sa Superbalita Cebu nga maoy iyang gikuhaan og base sa pagkuwestiyon sa saksi , sa dihang gipangitaan sa huwes ug prosecution og kopya sa maong pamantalaan.
Una nang gitug-an ni Riolito nga siya maoy nagdala sa timon sa pumpboat nga ilang gisakyan diin sakay ang mayora ug ang iyang bana gikan sa Dive Camp resort sa Bien Unido paingon sa kadagatan sa Olango sakop sa Lapu-Lapu City, sigun sa mando ni PB Boniel.
Si Atty. Boniel nagkanayon nga wa magkadimao ang mga pamahayag sa saksi base sa iyang na-unang judicial affidavit nga giluwatan ngadto sa judicial confession diha sa korte.
“The witness is a suspect himself. He was trying to avoid of being implicated that was the reason why he has to lie, to save himself,” tipik sa pamahaya sa abogado sa dihang nahinabi sa Superbalita Cebu.
Giklaro ni Atty. Romero nga katuyoan sa nagpadayong hearing aron pagtino kon angayan bang gamiton si Riolito isip state witness. Sa Enero 11, 2019 magpadayon ang cross examination niini. FVQ