GIPAKLARO ni Chief Inspector Ronald Lao, hepe sa Talomo Police Station nga ang napalgang patay nga lawas sa usa ka lalaki wala kadto'y kalabutan sa natigayong sinukliay og bala sa Barangay Talomo niadtong Lunes sa buntag.
Kini ang pagpaklaro ni Lao human nanggawas ang mga impormasyon sa social media nga ang patay nga lawas nga nakit-an sa Barangay Bago Aplaya, kaubanan sa mga nakasibat nga mga suspek atol sa pagsilbi sa warrant of arrest sa usa ka beach sa Brgy. Talomo.
Sumala ni Lao, nga nahubog ang biktima mao nga nahulog kini sa Bago Aplaya River sa iyang pagtabok nga maoy hinungdan sa iyang kamatayon.
Gani gipaklaro sab sa mga naka ila biktima nga dili kini sakop sa mga rebelde ug nailhan na usab ang pagkatawo niini nga residente sa Tugbok Davao City.
Una niini daghan ang mga pagduda nga basin og kaubanan sa mga NPA-SPARU nga nakatakas ang napalgang patay.
Gikuha na sa paryente ang patay nga lawas sa usa ka lalaki nga gitago ang pangalan. (RFN)