NAGTINGUHA ang usa ka konsehal sa dakbayan sa Sugbo nga mabutangan og libreng wifi connection ang tanang educational institutions sa siyudad.
Si Konsehal Eduardo Rama Jr., niduso og ordinansahon para mabutangan og wifi ang public ug private school lakip na ang mga unibersidad.
Ang proposed ordinance ni Rama gi-refer na ngadto sa committee on laws para sa dugang pagtuon.
Kon kini maaprobahan, ang City Government mogahin og pundo matag tuig.
Tuyo sa maong ordinansahon nga mahatagan og access ang mga tinun-an sa internet nga dako og ikatampo sa ilang maayo nga pagtuon.
Si Rama niingon nga kon adunay internet access, sayon sa mga tinun-an ug magtutudlo pagkuha sa mga kasayuran may labot sa edukasyon.
Ang konsehal niingon nga ang United Nations niila nga ang right to internet access gikonsidera nga usa ka tawhanong katungod nga nahasubay sab sa Department of Education (DepEd) Order No. 50 kun internet connectivity program.
Gipasabot ni Rama nga kon adunay access sa internet, mas daghan og makat-onam ang mga tinun-an sanglit adunay daghang kasayoran nga makuha gikan sa internet.
Kon maaprobahan ang maong ordinansa, ang Cebu City mogahin og pundo para sa maong proyekto.