KAPULISAN sa probinsya sa Sugbo nakadawat og report nga adunay mga hit squad sa mga drug personalities ang nag-target karon sa mga pulis sa syudad sa Talisay bugti sa P20,000 nga suhol.Kini tungod sa ilang subsob nga kampanya batok sa illegal nga drugas ug dako na og kahasol sa ilang illegal nga patigayon.
Giingong nagtampo-tampo ang grupo sa mga durugista nga naglihok sa habagatang Sugbo aron mahunong na sa Philippine National Police (PNP) ang ilang anti drug operation.
Apan kining maong impormasyon, matod ni Sr. Supt. Manuel Abrugena, ilang gisusi.
Ang report wa makompirmar kon balido hinungdan nga iyang gimandoan ang hepe sa Talisay City police station nga susihon kini pag ayo.
Bisan kon wa pa kini matino, angay nga magbantay sila sanglit usa sa ilang mga kauban nga si PO11 Jaylord Tabing gipusil sa usa ka drug personality sa Barangay Tabunok.
“I will be asking the chief of police if these allegations are true. Kaya palagi ko pong sinasabi sa ating kapulisan in every operations they will be making, dapat po talaga na mag ingat,” matod ni Abrugena.
Gipasabot ni Abrugena nga di lang mga pulis sa Talisay ang mamahimong target sa mga durugista, lakip na usab sa ubang bahin sa probinsya sa Sugbo.
Nanguha og hitman
Si Supt. Marlu Conag, hepe sa Talisay City police station, niangkon nga adunay big time drug personality nga padayon pang gawasnon nga mao ang leader sa usa ka drug group nga naglihok sa syudad.
Giila niya kini nga si Ariel Olivar, alyas Ladoy, kinsa giingong upline sa illegal nga negosyo ni Cheryl Villamedo Herongay.
Si Herongay, 30, nadakpan na niadtong miaging buwan sa Barangay Lawaan 1 sa ilang gihimong anti drug operation.
Kini nakuhaan og P2 million nga balor sa drugas uban sa usa ka alyas Sano.
Si Olivar giingon nga nang-hire og hitmen gikan sa Barangay Duljo Fatima, Dakbayan sa Sugbo nga maoy mopatay sa mga pulis sa syudad sa Talisay ug mga sakop sa Regional Mobile Force Battalion-7 nga nagbase sa Tanke.
Napiangan ang supply sa drugas sa tibuok dakbayan sa Talisay tungod sa pagbutang og unit sa kapulisan sa Barangay Tanke.
Di tinuod
Gihimakak usab ni Abrugena ang balita sa usa ka lokal nga mantalaan sa Sugbo nga iyang gipasanginlan ang mga elected official sa Talisay nga protector ug naa sa payroll sa mga drug personalities.
Ang iyang pamahayag atol sa press conference nga nakadawat silag impormasyon nga adunay elected official nga protector sa mga drug personalities apan wa magpasabot nga ang mga opisyal na sa syudad sa Talisay.
Kining maong impormasyon, matod sa CPPO director, gitino pa.