2 intsik gitulis, 1 patay

NAKABSAN sa kinabuhi ang gituohang driver samtang angol ang negusyanting babaye nga pulos chinese national human gitulis ug gipusil niadtong Domingo mga alas 7:30 sa gabii saJusto Ramonal, Brgy 32, ning siyudad sa Cagayan de Oro.

Giila ang biktima nga mao si Shu Ziang, nagpuyo sa susamang dapit kinsa dead on arrival sa Polymedic General Hospital. Samaran usab sa bukton si Ann Young kinsa kauban ni Ziang niadtong tungora.

Si Ziang ang gituohang driver ni Young sa negusyo niini.

Si Police Chief Inspector Reynaldo Reyes kinsa hepe sa City Intelligence and Detective Unit (Cidu) nibutyag sa Sun.Star Superbalita ngaposibleng giatangan ang mga biktima kinsa gikan pa sa ilang tindahan sa Cogon niadtong tungora.

Gikan pa nga ninaog sa ilang sakyanan gawas sa puloy-anan si Young ug misunod si Ziang dihang giduolan sa lima ka mga armadong lalaki.

Nideklarar og tulis ang mga suspetsado dungan tion sa mga biktima og pistola apan giingong nidumili si Young paghatag sa iyang shoulder bag hinungdan nga gipusil kini sa iyang bukton.

Si Ziang misuway sa pagsukol sa mga tulisan hinungdan nga gipusil sa dughan maka usa ka higayon ug gituohang naigo ang kasing-kasing hinungdan sab sa hinanaling kamatayon.

Matud ni Reyes nga wala pa matino ang kantidad nga nakuha sa mga tulisan labina nga dili pa maestorya ang biktima ug mga hingtungdan niini.

Apan nitumaw ang taho nga sulod sa maong bag nga nakuha sa tulisan mao ang kantidad nga P200 mil nga kita sa mga RTW goods.

Matud ni Reyes nga casual lamang kaayo ang mga tulisan gani wala kini nagsul-ob og bonnet ug walay mga tabon sa nawong kinsa sakay sa duha ka mga motorsiklo.

Nakuha sa crime scene ang usa ka basyo sa bala sa 9mm pistol.

Sa inisyal nga imbestigasyon aduna nay natumbok nga mga suspetsado sa pagpanulis apan dili lamang ikabutyag ning panahona labina giplano pa ang pagsikop kanila.

Kasong robberry, homicide ug frustrated homicide ang atubangon sa mga suspetsado kon sila masikop.