MIPAGUWA sa iyang kadismaya si naturalized Filipino player sa Samahang Basketball ng Pilipinas (SBP) human nga wala siya mahilakip sa final 12 sa Team Pilipinas nga moduwa sa FIBA Asian Qualifying rounds.
Suma ni Blatche, nakurat gyud kaayo siya human wa siya maapil sa listahan.
Dugang niya nga wala man lama'y bisan usa ka miyembro sa SBP ang miduol kaniya o iyang international agents aron mosulti sa rason.
Gitawag pa niyang “unprofessional” ang gihimo sa SBP.
Ni Blatche, ang nahitabo mohatag og negatibong impresyon sa mga Pinoy fans nga usa sa labing mahiligon sa basketball.
Sa nakalabay nga adlaw lang, gipahibalo na ang opisyal nga linyada sa nasud.
Upat ka magduduwa gikan sa Barangay Ginebra ug tulo sa San Miguel ang mobandera sa Final 12 nga giyahan ni coach Yeng Guiao.
Gipili ni Guiao sila LA Tenorio, Greg Slaughter, Japeth Aguilar ug Scottie Thompson sa Gin Kings, four-time PBA MVP June Mar Fajardo, Alex Cabagnot ug Marcio Lassiter sa Beermen.
Anaa sab sa Final 12 sila Gabe Norwood ug Beau Belga sa Rain or Shine Blackwater big man Poy Erram, Phoenix shooter Matthew Wright ug NorthPort point guard Stanley Pringle.
Ang tim maoy isabak ni Guiao kontra Kazakhstan karon, alas-7:30 sa gabii sa Mall of Asia Arena sa Pasay City.
Samtang sa pakigbugno sa Pinas sa Iran sa Lunes sa samang venue ang 6-foot-8 Fil-German power forward Christian Standhardinger sab ang manguna.
Kabahin gihapon sa training pool sila Arwind Santos sa San Miguel, Paul Lee sa Magnolia, Jayson Castro ug Troy Rosario sa TNT Katropa ug Kai Sotto ug Ricci Rivero.