GIBUKSAN ni Presidente Rodrigo Duterte ang bag-ong Bohol-Panglao International Airport niadtong Nobiyembre 27. Iyang gibatbat ang Bohol airport nga mas nindot pa sa airport sa Davao City, diin mayor ug kongresman siya sa dugay nga panahon sa wa pa siya mapresidente.
Ang Bohol-Panglao International Airport natukod sa kantidad nga P8.9 billion ubos sa suporta sa gobiyerno sa Japan ug ang fund agency nga Japan International Cooperation Agency (Jica). Kini ang labing unang “eco-airport” sa Pilipinas subay sa paggamit og LED lights ug solar panels.
Sirhan na unya ang karaang airport sa Tagbilaran City.
Sa Panglao airport, pwede maka-landing og dungan ang upat ka dagkong eroplano sama saBoeing 777s and Airbus 330s, o pito ka gagmay nga eroplano sama sa Airbus 321s or 200s. Gilantaw nga naa sa dos milyones ka mga pasahero ang mapahiluna sa Panglao airport kada tuig.