MOKABAT sa P4.7 milyones nga balor sa shabu ang nasakmit ug tulo ka mga tawo, diin usa ang menor de edad, nasikop sa kapulisan sa Dakbayan sa Mandaue pinaagi sa usa ka buy bust operation.
Ang mga nasikop giila nga si Belen Tiro Abellana, o mas naila nga “Day o Belinda”, 36,, ug Christian Quibol Bahan, 38, parehong mga lumolupyo sa sitio Sto. Niño, Brgy. Duljo, Dakbayan sa Sugbo ug usa ka 15 anyos nga lalake nga taga sitio Suba, Brgy. Pasil, Cebu City.
Gihimo ang buy bust operation alas 11 Miyerkules sa gabii, Nobiyembre 28, sa mga sakop sa Drug Enforcement Unit sa City Intelligence Branch sa Mandaue City Police Office (MCPO) pinanguluhan ni Supt. Bernouli Abalos, hepe sa CIB.
Matod ni Police Chief Inspector Mercy Villaro, tigpamaba sa MCPO, nga mga newly identified drug player ang mga nasikop.
Usa ka concerned citizen ang nitug-an sa CIB kalabot sa ilegal nga transaction sa maong grupo.
Subject sa operasyon mao si Abellana, kinsa niangkon ra usab nga iya ang nasakmit nga mga drugas, apan giingong nga igo ra siya gisugo.
Dugang ni Abellana nga niadtong Septiyembre lang siya nagsugod sa ilegal nga negusyo.
Tungod sa kalisud ug alang sa iyang upat ka mga anak, napugos siya nga sa pagsud sa ilegal nga patigayon.
Giangkon usab niya nga silang grupoha gyud ni Bahan ug sa menor de edad ang magkoyug sa pagdeliver sa drugas.
Apan si Bahan, kinsa nangangkon nga habal-habal driver nanghimakak kay igo lang siya gihangyo ni Abellana aron ihatud sila.
Matod ni Villaro nga ang transaksyon nagsugod kagahapon sa buntag, apan kanunay lang nga magbalhin-balhin sa lugar diin mag-abot.
Nakompiskar gikan sa tulo ang upat dagkung bulto sa gituohang shabu nga adunay gibug-aton nga 400 grams ug adunay Dangerous Drugs Board (DDB) value nga P4,720,000.
Lakip sa gisakmit sa mga pulis ang motorsiklo nga gisakyan sa tulo.
Sa pagpakig-alayon sa Cebu City Police Office, newly identified drug player usab ang tulo sa dakbayan sa Sugbo.
Gipalawman pa sa kapulisan ang gihimo nga pakisusi kon si kinsa ang kontak sa tulo ug kon asa gikan ang suplay sa ilang drugas.