DAGHANG nasayod nga ang binuwang kontribusyon ngadto sa Social Security System (SSS) dako og matabang labi na sa atong katiguwangon apan ubay-ubay sab gihapon ang mga mamumuo, nga kasagaran batan-on, ang hangtod karon wa masayod sa ubang benepisyo nga mahimo nilang makuha.
Tungod kay gamay ra man ang nahibalo, gamay ra sab ang naka binipisyo ini sa mga mi-aging tuig.
Kining mosunod maoy ubang mga benipisyo nga mahimong makuha gikan sa SSS:
Benepisyo kung masakit. Kung kalit nga madisgrasya o magka-sakit, ma admit man sa ospital sulod sa 4 ka adlaw o naa ra sa balay nagpa-ayo, unya nahurot na og gamit ang sick/leave credits, ang membro sa SSS makakuha og inadlaw nga cash allowance sa mga adlaw nga di pa niya makaya ang pagpanrabaho og balik.
Maternity nga benepisyo. Kung ang usa ka inahan nga miyembro sa SSS bag-ong nanganak o nakuhaan, mahimong makakuha og Maternity Benefits, inadlaw nga cash allowance sulod sa 60 ka adlaw kung normal delivery o 78 ka adlaw kung cesarian section.
Disability nga benepisyo. Simbako palayo, kung ang usa ka miyembro ma-disabled (partial o total disability), makakuha kini og disability benefit nga mahimong ihatag matag buwan pina-agi og pension o tingob kon lump sum. Kasagaran, ang binuwang ihatag nagkantidad og P1,000.00 ngadto sa P2,400.00 depende sa gitas-on sa iyang panerbisyo sa gitrabahoan. Pun-an pa kini og P500.00 nga allowance.
Benepisyo sa namatyan. Ang makadawat ini mga legal nga beneficiary o dependent sa miyembro, ma asawa/bana ug mga dependent nga mga anak, nga gideklarar sa namatay ngadto sa SSS. Kini mahimong ihatag binuwan gikan sa 1,000-2,400.00 o lumpsum apil ang 13th month pension kada Disyembre.
Salary Loan. Kung ang miyembro nanginahanlan og loan para sa dinalian og ginagmay nga panginahanglan ug katuyoan, ang miyembro mahimong mangutang nga gamay o ubos ra og tubo, mga 10% ra kada tuig. Kini nga utang mahimong e-renew basta lang nakabayad na og 50% sa principal nga kantidad nga inutang.