GUSTO ni Presidente Rodrigo Duterte nga ang military magtukod og anti-Sparrow unit nga isakbang sa Sparrow Unit sa mga rebeldeng New People’s Army (NPA).
Ang Sparrow Unit mao ang tigpatay sa mga sundawo, pulis, government official ug mga sibilyan nga ilang kaaway o wa makauyon sa ilang kawsa. Gusto tingali sa Presidente nga sakbangan og kayo ang kayo. Pagngon ang kayo pinaagi sa kayo.
Apan epektibo ba kaha kini? Kon maayo pa kini, gigamit usab unta kini sa nangaging mga administrasyon, labina sa panahon ni anhing presidente Corazon Aquino nga taas pa og suliran sa rebelyon sa mga komunista.
Ilang nakita nga ang pagpatay sa mga rebeldeng NPA usa lang ka aspeto sa gubat batok sa mga rebelde. Ang laing mga pamaagi nag-target sa ubang mga ugat sa suliran-kakabus, inhustisya, kakuwang sa serbisyo sa kagamhanan sa lagyong mga lugar, way mga imprasktraktura sa mao nga mga dapit ug uban pa.
Ang gubat diay gamit ang armas usa lang ka paagi sa pagsumpo sa rebelyon. Ang mas dakong aspeto mao ang pagtubag sa yangongo sa mga rebeldeng natintal sa pakigbisog aron mobalik sila sa sabakan sa balaud.
Ang pagtukod og anti Sparrow Unit aron mopatay di maoy tubag. Kay kuyaw kini sa pangabuso sa mga mapahimudsanon, sama sa pipila ka mga hitabo sa anti-drug war.
Ang pagsakbang sa Sparrow Unit mao ang maayo nga intelligence aron madakpan sa di pa sila makaigo sa ilang target.
Ang pagtukod og death squad makapasamot na hinuon sa problema, inay magsulbad niini. Nasuwayan na kini sa rehimeng Marcos.