DRAYBER sa duha ka mga sakyanan malambigit sa kaso sa road rage sa V. Rama Avenue, Barangay Calamba, dakbayan sa Sugbo Sabado sa kaadlawon, Disyembre 1, diin usa ka sakyanan nawad-an og kontrol ug nabangga.
Ang duha nga pulos na mga hamtong mao sila si Concord Fabillar nga nagmaneho sa iyang Honda Brio Amaze ug Mickel Torralba sa iyang Toyota Corolla.
Sumala sa blotter sa kapulisan, ang nauwahi nikalit og babag sa atubangan sa sakyanan ni Fabillar ug giingong nigawas si Torralba og nanion dayon gamit ang gituohang kalibre .45 nga armas.
Dugang saysay sa blotter, tungod sa kahadlok, nisutoy og padagan si Fabillar apan nawad-an kini sa kontrol, nibangga sa sidewalk ug ngadto sa laing sakyanan nga nag-park sa daplin sa dan.
Giingong si Fabillar padulong motawag og pulis apan gibanggaan ang iyang sakyanan ni Torralba hinungdan nga nakaangkon og samad sa lawas ug gidala sa ospital.
Samtang, ang inahan ni Fabillar nga si Emma nisulti sa Superbalita Cebu nga ang iyang anak giatngan sa dan ug gitiunan og armas.
Si Torralba nasikop sa ningresponde nga kapulisan gikan sa Sawang Kalero police station 6.
Apan sa pakighinabi sa Superbalita Cebu, si Torralba nihimakak sa mga alegasyon ni Fabillar ug wala moangkon bahin sa armas.
Matod ni Torralba, makig-istorya lang unta siya kang Fabillar diin iyang gibutyag nga dunay relasyon sauna sa iyang uyab.
Dugang niya nga igo ra niyang gitudlo si Fabillar ug wala manion apan ang nauwahi nilikay ug gilahi og sabot sa iyang pag-ali sa sakyanan.
Si Torralba gitanggong sa Police Station 6.
Samtang, si Fabillar nag-alim sa iyang samad. Nipadayag ang inahan niini nga mopasaka og kaso batok kang Torralba. (Jolissa Mae Taboada, intern)